Princi William thuhet se është i interesuar të përdorë pronat mbretërore për të ndihmuar të pastrehët kur të bëhet Princi i Wales-it, një titull që do të trashëgojë kur babai i tij Princi Charles të bëhet Mbret.
Princi, 39 vjeç, i ka kërkuar ekipit të tij të eksplorojë se si ndërtesat që janë pjesë e Dukatit të Cornwall – pasuria që u krijua rreth 700 vjet më parë nga Edward III për të siguruar fonde për trashëgimtarin e fronit – mund të përdoren për të ndihmuar të pastrehët, sipas “The Telegraph”.
Një burim i tha gazetës se ideja ishte aktualisht në një fazë hetimore, por konfirmoi: “Princi është i interesuar të gjejë mënyra për të ndihmuar në zbutjen e situatës së të pastrehëve në çdo mënyrë që mundet”.
Nën drejtimin e Princ Charles, Dukati i Cornwall-it është kthyer në një ndërmarrje shumë milionëshe, duke siguruar të ardhura për të drejtuar zyrën e Princit të Wales-it, si dhe familjen e Princit William. Aktualisht përfshihen prona në Londër dhe më shumë se 130,000 hektarë tokë ,me 160 milje të bregdetit britanik ,në 23 qarqe të Anglisë dhe Wales-it.
“Kam filluar të mendoj se si do ta trashëgoj Dukatin një ditë,” u tha William fermerëve në dokumentarin “Princ Charles: Inside The Duchy of Cornwall”, i cili u transmetua në 2019.
