“Ngjan si një festë luksoze dhe trendi pa një listë të ftuarish ekskluzivë”. Kështu e krahason stilin e Dua Lipës revista prestigjioze e muzikës “Rolling Stone”, e cila e liston këngëtaren shqiptare ndër 10 artistët e rinj që “duhet” t’i njohim.
“Hotter than Hell” është një hit në Mbretërinë e Bashkuar dhe artistja që ka nënshkruar me “Warner Bros” do të jetë në turne së shpejti me Troye Sivan”, shkruhet në uebsajtin-in e revistës, që i nxit ndjekësit të dëgjojnë muzikën e 21-vjeçares.
Lipa ka rrëfyer se filloi të jetojë e vetme në Londër që në moshën 15-vjeçare dhe falë një menaxheri që kishte gjetur në rrjetet sociale, shkonte në studio pesë ditë në javë dhe gjithashtu punonte si pritëse në një restorant.
“Tani po jetoj ëndrrën time dhe po bëj atë që kam dashur gjithnjë të bëj”, shprehet ajo.
Më tej Dua thotë se ka qenë gjithmonë një fanse e muzikës pop. “Albumi i parë që më dhanë kur isha e re ishte “Whoa, Nelly!” nga Nelly Furtado. Më pas mora dhe albumin “Missundaztood” të Pink. Ishte koha kur thosha, “Oh Zot, dua të bëhem si ato!”. E dashuroja mënyrën se si Pink u rrit në karrierë. E admiroja shumë. Mendoj se ngaqë i doja ato kaq shumë kur isha e re, më ka lënë një gjurmë të tillë që me të vërtetë më frymëzon në atë që bëj tani”, thotë këngëtarja nga Kosova.
Burimi: Rolling Stone
