Ish-presidenti amerikan Barack Obama ka publikuar në Twitter një listë të filmave të preferuar gjatë vitit 2021.
Një nga filmat e përfshirë në listën e tij ka qenë edhe filmin boshnjak “Quo vadis, Aida?”.
Në përmbajtien e këtij filmi trajtohet qyteti lindor i Bosnjës, Srebrenica gjatë gjenocidit të vitit 1995.
Një nga emrat që luan në këtë film është edhe aktori, Alban Ukaj.
“Këta janë filmat e mi të preferuar të 2021-shit. Secili prej këtyre filmave tregon një histori të fuqishme dhe shpresoj që t’i shijoni po aq sa unë”, shkruan Obama.
Kujtojmë se pak ditë më parë filmi me regji të Jasmila Zbanic u shpall filmi më i mirë evropian i vitit 2021 në Berlin në “34th European Film Awards”.
Filmi trajton historinë e Aidës, e cila është një përkthyese për OKB-në në qytetin e vogël të Srebrenicës. Kur ushtria serbe merr qytetin, familja e saj është në mesin e mijëra qytetarëve që kërkojnë strehim në kampin e OKB-së.
Filmi pati premierën botërore në “Festivalin e 77-të Ndërkombëtar të Filmit” në Venecia më 3 shtator 2020. Ai u shfaq gjithashtu në “Festivalin Ndërkombëtar të Filmit” në Toronto më 13 shtator 2020. Në shkurt 2021, “Super LTD” fitoi të drejtat e shpërndarjes në SHBA për filmin dhe u publikua në Shtetet e Bashkuara përmes kinemasë virtuale më 5 mars 2021.
