Mes 13 anëtarëve të shërbimit ushtarak amerikan dhe dhjetëra afganëve që u vranë të enjten pas një sulmi në Kabul gjatë një operacioni evakuimi ishte dhe një rreshtere detare nga Roseville.
Nicole L. Gee 23-vjeç nga Roseville ndërroi jetë pasi një kamikaz shpërtheu eksplozivin jashtë aeroportit ndërkombëtar të Kabulit.
Gee kishte dokumentuar shërbimin e saj në Afganistan në faqen e saj personale në Instagram. Postimi i saj u fundit ishte pikërisht në aeroportin ku ndërroi jetë.
Ditë më parë, ajo kishte publikuar një tjetër fotografi në Kabul duke mbajtur në krah një foshnje afgane.
“Unë e dua punën time,” shkroi ajo në postim.
Sulmet terroriste pranë aeroportit të Kabulit dhe disa shpërthime të njëpasnjëshme ju morën jetën më shumë se 100 personave në Afganistan. Pamjet e publikuara në mediat e huaja ishin tronditëse, por akoma më tronditëse janë rrëfimet e atyre që e përjetuan nga afër këtë situatë.
Muhamedi, i cili tha se ndihmoi forcat amerikane dhe punoi me NATO-n në Afganistan, ishte në aeroport me familjen e tij të enjten, duke u përpjekur të fliste me trupat amerikane dhe të gjente një fluturim jashtë vendit.
“Unë isha me familjen time duke qëndruar vetëm 50 hapa larg shpërthimit që ndodhi dje. Unë nuk mund t’ju përshkruaj situatën, ishte si një skenë nga një film që e pashë në realitet. Kishte një lumë gjaku… nëse doje të bëje disa hapa, së pari duhet të kontrolloje për të parë nëse ka trupa të vdekur nën këmbët e tua për të lëvizur.
U mbulova sytë vajzave të mia që të mos shihnin situatën, sepse ishte një situatë shumë e keqe. Pas kësaj, nxora familjen time jashtë dhe shkova në shtëpi”, ka rrëfyer ai për “CNN”.
