Në orët e para të mëngjesit të kësaj të shtune mbërriti në vendin tonë avioni i tretë me afganë. Avioni i dytë mbërriti rreth orës 23:00, ndërsa i treti pas mesnatës. Qytetarët e arratisur nga Afganistani u pritën nga ambasadorja e SHBA-ve, Yuri Kim, ministrja e Jashtme, Olta Xhaçka dhe kryeministri Edi Rama.
Kryeministri ka bërë të ditur përmes një postimi në rrjete sociale se deri më sot në Shqipëri kanë mbërritur 275 afganë.
“MIRËMËNGJES PA U GDHIRË ?
dhe nga Rinasi ku deri sot kanë mbërritur 275 të arratisur nga Afganistani fatkeq, ndër të cilët edhe gra aktiviste të shoqërisë civile, pedagogë, punonjës institucionesh, gazetarë, së bashku me familjet e tyre, ju uroj një fundjavë të qetë”, shkruan kryeministri në rrjetet sociale.
Ndërkohë ditën e djeshme në orët e para të mëngjesit mbërriti në Shqipëri edhe një avion me 121 afganë, të cilët u vendosën në struktura hotelerie në qytetin e Durrësit. Ndërsa afganët që arritën me dy avionët e tjerë në vendin tonë do të evakuohen në godinat e konvikteve të “Qytetit Studenti”, të cilat janë përshtatur posaçërisht për ta. Qytetarët afganë që mbërritën në Shqpëri i janë nënshtruar fillimisht kontrolleve mjekësore.
Shqipëria do të presë në total 4000 afganë, që janë detyruar të largohen nga Afganistani, pas marrjes nën kontroll të kryeqytetit të vendit nga talebanët.
