Vetëm dy orë para koncertit të madh në Prishtinë, këngëtari i operas Ramë Lahaj humbi personin më të shtrenjtë në jetën e tij. E ëma e Ramës u nda nga jeta duke i lënë një boshllëk e dhimbje të madhe të birit, i cili mori forcën të dalë para qytetarëve dhe t’i “servirë” të gjithëve artin e tij, pavarësisht situatës së rëndë në të cilën ndodhej.
Sot, ai i ka bërë një dedikim shumë prekës të ëmës në rrjete sociale. Lahaj ka postuar në rrjete sociale një foto, në të cilën shihet duke i prerë thonjtë e këmbës nënës së ndjerë, që shfaqet e ulur në një karrocë me rrota.
“Nenë, u çova edhe sot me ritmin e tenxhereve tua të dikurshme, veç se sot nuk ishe në kuzhinë. Mu dasht me ardhë me t’pa nder vorre. Erdha para sabahut, n’6. Ritmin që ma ndjellë edhe mua për të më përcjelle edhe sot e kësaj dite, po ti sot një llaf s’ma bone. Se le mo që as mëngjesin s’ma shtrove. Nanë, kam mëndu që për asnjë arsye në jetë nana se len fminë pa hangar. As gabel s’ma the e as kryet s’ma përkëdhele. As nuk me buzëqeshe si dikur. E pa buzëqeshjen tanë nanë, unë jam krejt i vyshkun. Eh moj nanë magari qe jam, për një moment mendova që muj kthehemi bashkë n’shpi. Fmi hesapi. “Gabeli jot”, shkruan Ramë Lahaj në dedikimin e tij.
Të shumtë kanë qenë miqtë, kolegët dhe fansat që i kanë shprehur ngushëllimet e përzemërta artistit, ndër to është vënë re edhe ai i aktorit të mirënjohur, Çun Lajçit, i cili ka rrëfyer një histori të tillë trishtuese, të përafërt me atë të Lahajt.
“Eh more artist! Nuk ma beson, por po ta them se njësoj si ty më vdiq nëna në 1972. Isha duke dalë në skenë për të luajtur Hamletin kur mora lajmin, si ti ‘sot t’vdiq nëna. Nuk u tregova as kolegëve, sepse salla ishte përplot shikues. Dola dhe luajta në shfaqje, e pastaj mora rrugë natën për Pejë. Oh sa ta njoh dhimbjen artist, por bëhu i fortë se nënat na ikin gjithmonë pa na e hequr mallin”, shkroi Lajçi.
