Ai është një figurë e rëndësishme në Kosovë dhe jo vetëm, por për atë që njihet më shumë është mënyra e veçantë e organizimit të eventeve të ndryshme, apo gatishmëria për të ndihmuar gjithmonë qytetarët e vendit të tij.
Ashtu si edhe vitin e kaluar, kreu i AKR-së, Behgjet Pacolli, lajmëroi në llogarinë e tij në “Facebook”, se ka vendosur që ta festojë ditën e tij të lindjes bashkë me fansat. Ai ka thënë se në gjithë rrugëtimin e tij, është mbështetur dhe përkrahur nga ndjekësit e tij në “Facebook” ndaj ka dëshirë që t’i ftojë të gjithë ata në oborrin e shtëpisë së tij luksoze në Hajvali të Prishtinës, ku do të mbahet një festë e madhe e cila do të quhet “Facebook Party”.
Ai ka lajmëruar se të shtunën, në datën 10 shtator do të nisë festa e madhe në orën 18:00 me një koncert të madh. Ndërsa zbulohet se dy nga të ftuarit do të jenë Dafina Zeqiri dhe Ledri Vula, ndërkohë që do t’i bashkohen atyre edhe 12 emra të tjerë të tregut muzikor shqiptar, por që ende nuk janë zbuluar.
Behgjet Pacolli i ka kërkuar ndjekësve të tij në rrjetin social, të konfirmojnë ardhjen e tyre në mënyrë që edhe ai të organizohet sa më mirë. Deri më tani rreth 3000 veta e kanë konfirmuar pjesëmarrjen në këtë event ndërkohë që Pacolli vazhdimisht në ftesat e tij i referohet të rinjve, kjo sepse siç duket edhe koncerti do t’i dedikohet më së shumti atyre.
Burimi: Facebook
