Gjatë sezonit të fundit televiziv, Jona Spahiu ishte çdo të diel prezente në ekran me spektaklin e humorit “Kosherja”. Ky ishte formati i parë i këtij lloji që asaj ju besua për prezantim dhe Jona ja doli mbanë më së miri. Së fundmi në një intervistë për revistën “Living”, Jona ka folur gjatë për këtë eksperiencë dhe jetën e saj si nënë e grua.
Ajo ka treguar se me Bes Kallakun, që e pati partner në prezantim, nuk kishte miqësi më parë.
“Njiheshim, por në kufijtë e formales, aq sa mezi përshëndeteshim në ambientet e televizionit ku punonim të dy, duke ditur se sa VIP ishte Bes Kallaku (qesh). Përtej shakave, me Besin kemi një kimi që perceptohet lehtësisht edhe nga televizori”
Gjatë spektaklit “Kosherja” ajo provoi veten si aktore në disa skeçe dhe duket se është e hapur për role të tjera.
“Maksimumi mund të zëvendësoj Bleona Qerretin te filmi tjetër i Bes Kallakut (qesh). Nuk e kornizoj dhe as nuk e kufizoj veten, kështu që çdo projekt që më përfaqëson dhe më jep kënaqësi e energji të mirë, është i mirëpritur”
Ajo ka treguar se motra ka qenë gjithmonë kritikuesja e saj më e madhe brenda familjes, por shpesh i jep edhe këshilla duke nisur nga modeli i flokëve e deri tek mimikat.
Moderatorja është shprehur se e ka shumë vështirë të ndajë kohën mes familjes dhe punës, por përpiqet të bëjë më të mirën e mundshme.
“Sa herë që më bëjnë këtë pyetje, prekem, sepse është një nga pikat e mia të dobëta dhe kështu duhet të jetë për çdo nënë, e angazhuar ose jo. Përtej përkushtimit për t’i bërë të gjitha, është e pashmangshme koha fizike që i merret familjes, çfarëdolloj pune zgjedh të bësh. Nga ana tjetër, besoj që edhe sikur kjo kohë të jetë me bollëk, kur bëhet fjalë për familjen, nuk është asnjëherë mjaftueshëm. Një shprehje e bukur që kam dëgjuar kohët e fundit thotë: “Familja është si shtëpia e plazhit, mos e lër rërën të futet brenda”, dhe unë kujdesem çdo ditë që të mos e fus rërën brenda. :)”.
Kur është pyetur se si reagon Raideni kur e sheh në ekran, Jona është përgjigjur:
“Në fillim i dukej e çuditshme e si rrjedhojë ishte indiferent, por nga ajo kaluam te “dua të shoh mamin e bukur te kosherja””.
