Pas mbërritjes së variantit “Delta” në vendin tonë, Komiteti Teknik i Ekspertëve ka dalë në një konferencë të jashtëzakonshme për mediat.
Albana Fiço është shprehur se dyshimet për variantin “Delta” janë konfirmuar tashmë dhe mostrat për variantin e ri janë gjetur në qytete si Tirana, Elbasani, Shkodra, Lezha, Kavaja, Gjirokastra, Korça, Peqini, Mati dhe Vlora.
“Ka ardhur përgjigjja nga Berlini për variantin Delta. Dua t’iu sjell në vëmendje situatën epidemiologjike në vend, që ka shënuar disa rritje në raport me incidencën, që është 10 për 100 mijë banorë, mesatarja ditore është rritur, numri total i rasteve rezulton i rritur, numri i bashkive që janë përfshirë nga rastet e reja ka shkuar në 10. Në Infektiv janë të shtruar 9 pacientë, fatmirësisht nuk kemi pasur raste fatalitetesh. Vijojnë të shtohen numrat e personave të vaksinuar me dy dozat e vaksinës.
Sa i përket variantit Delta, dyshimi ynë i arsyeshëm është konfirmuar tashmë. Dërguam 21 mostra kimike, që kanë rezultuar pozitivë. Këto mostra i kemi vënë mënjan për periudhën 1 qershor-12 korrik, kur filluam të shohim sinjalet e pazakonta. E rëndësishme është që këto mostra i kemi gjetur në qytete si Tirana, Elbasani, Shkodra, Lezha, Kavaja, Gjirokastra, Korça, Peqini, Mati dhe Vlora. E gjithë kjo përpjekje ka një vlerë të veçantë, që është vaksinimi i shoqëruar me masat që janë në fuqi dhe që duhen zbatuar nga qytetarët.
Qarkullimi i këtij varianti tregon se ne nuk e kemi përfunduar situatën, ndaj duhet që personat që kanë simptoma, të karantinohen. Të gjithë ata raste që kanë nevojë për ndihmë të shpejtë mjekësore, të telefonojnë në numrin e urgjencës 127”, tha Albana Fico.
Në këtë mbledhje të jashtëzakonshme, Zv/ministrja e Shëndetësisë, Mira Rakacolli deklaroi se pavarësisht konstatimit të variantit “Delta” në Shqipëri, masat anti-covid nuk do të ndryshojnë.
“U vu re që ka një rritje të lehtë të rasteve, shtrimet në spital vazhdojnë në nivele të qëndrueshme dhe më të ulëta në krahasim me rastet e reja dhe vazhdon që të mbetet numri i rasteve të shtruar dhe që kanë nevojë për kujdes spitalor janë të pavaksinuar. Rastet po rriten te personat që nuk janë vaksinuar.
Komiteti i Ekspertëve mendon se pavarësisht se është vërtetuar dyshimi për variantin Delta, mbrojtja është njëlloj dhe niveli i masave nuk ka asnjë arsye që të ndryshojë. Masat do të jenë po ato që kanë qenë më parë”, tha ajo.
Në lidhje me situatën në spitalin Covid-19, është shprehur profesori Dhimitër Kraja duke thënë se gjendja është e qëndrueshme.
“Në spitalin COVID-1 ndodhen 9 pacientë, gjendja e tyre është e kënaqshme pavarësisht se ka diferenca. Nuk ka pacientë që janë vaksinuar më parë apo kanë kaluar sëmundjen, me përjashtim të një rasti, që ka bërë vetëm një vaksinë dhe atë e ka ndërprerë nuk e ka bërë dozën e dytë. Mosha vazhdon që të jetë mbi 69-72 vjeç. Situata është e mirë, nuk kemi pasur raste shumë të rënda, nuk ka pasur vdekje”.
Albana Fico, shefja e ISHP-së kërkoi zbatimin e zbatimin e masave.
”Vaksinimi masiv i shoqëruar me masa, pasi të gjitha rekomandimet kanë kryefjalë të bisedës së tyre vaksinim, bashkërenduar edhe me masat.
Është një mundësi e shtuar për të kujtuar se nuk kemi përfunduar me pandeminë dhe nëse për një moment harruam se jemi në këtë situatë, qarkullimi i variantit tregon se nuk e kemi përfunduar këtë detyrë. Prandaj të gjithë ata që kanë shenja apo simptoma të karantinohen dhe ata që kanë nevojë për ndihmë të telefonojnë në numrin 127”, tha ajo
