Sot ajo njihet si një ndër vajzat më të njohura të showbiz-it shqiptar dhe një ndër këngëtaret më të kërkuara në tregun muzikor. Këngët e saj janë shndërruar në hite, por pak kush e di që edhe pse Dhurata Dora këndon në shqip, ajo në fakt ka lindur në Nurnberg të Gjermanisë, në vitin 1992.
Emri i saj i vërtetë është Dhurata Murturi, ndërsa ai i artit “Dora” është krijuar në Gjermani, aty ku këngëtarja nisi hapat e para në muzikë.
Pas publikimit të këngës së saj të parë me videoklip “Vetë kërkove“ e cila u pëlqye nga publiku, Dhurata vazhdoi edhe me bashkëpunimin e parë me këngëtarin Don Arbas i cili posedon një studio muzikore “Arba Sound” dhe është shumë i njohur me projektet e tij për këngëtarë të ndryshëm shqiptarë.
Dhurata Dora në fakt u bë shumë e suksesshme me këngën “I Like dat“. Me mbi 2 milionë klikime, një projekt i punuar nga reperi 2Ton dhe me një klip ku Dhurata Dora shfaqet shumë seksi, i solli asaj suksesin më të madh.
Kjo ishte edhe arsyeja që Dhurata nuk u ndal dhe vazhdoi të sillte edhe projekte të tjera të reja. I radhës do të ishte hiti i vitit 2013, “Edhe pak“, një bashkëpunim mes Dhurata Dora, Dj Blunt, Real 1 dhe Lumi B.
Një bashkëpunim në mes Dhurata Dorës dhe këngëtarit Young Zerka solli këngën “Roll“ për të cilën realizuan edhe një klip shumëngjyrësh, artistik dhe atraktiv.
Klipet e radhës do të ishin “Nice and Slow”, ‘A BOMBI’, “Ti don”, dhe “Shume On”, që pati një sukses shumë të madh që kur u publikua. Dhurata publikoi këngën “Zoom Zoom” me Vig Poppa që u publikua në fillim të vitit dhe pastaj me një këngë të suksesshme, e cila titullohet “Numrin e ri”.
Bashkëpunimi më i fundit që ka rezultuar në një hit titullohet “Bongo”, një duet me reperin Capitall T, këngë e publikuar në vitin 2016 dhe vijon të marrë miliona klikime.
Edhe pse nuk kanë kaluar shumë vite që nga publikimi i këngës se saj të parë, Dhurata Dora ka pësuar një transformim në look-un e saj që është dhe një ndër tematikat më të diskutuara sa i përket kësaj këngëtareje shqiptare. Jo pak media e kanë akuzuar për ndërhyrje dhe operacione plastike, që vetë Dhurata nuk i ka mohuar por edhe nuk ka dashur të prononcohet për to.
Megjithatë ndryshimi i saj nga viti 2013, kur u paraqit me këngën “I like dat” deri në vitin 2016 me “Bongo”, është i dukshëm dhe videoklipet flasin vetë.
Sa i përket çështjeve të zemrës, Dhurata Dora ka qenë prej vitesh e lidhur me një djalë të ri nga Prishtina, që quhet Masar Shehu. Pas shumë vitesh bashkë, Dhurata Dora i ka dhënë fund lidhjes me të. Mediat shkruanin në fillim të këtij viti se, ata janë ndarë për shkak të mosmarrëveshjeve që lidheshin me karrierën e këngëtares dhe paratë.
Gjithashtu, persona pranë tyre kanë treguar se arsye mund të ketë qenë edhe xhelozia e tij, pasi ai e ka ndjekur këngëtaren në të gjitha koncertet e saj si menaxheri i saj. Mediat kosovare folën edhe për një tradhti të mundshme nga ana e Masarit më një vajzë bionde bukuroshe, arsye që e detyroi Dhuratën të largohej nga ai.
Burimi: ICONstyle
