Një tjetër koncert pritet të zhvillohet në nder të shenjtores Nënë Tereza, por tashmë në kryeqytetin shqiptar. Ndërsa Al Bano Carrisi pritet të vijë në Shqipëri për të performuar, ajo ditë do të jetë e rëndësishme për këngëtarin dhe aktorin italian.
Koncerti do të mbahet më 17 shtator, me rastin e Shenjtërimit të Nënë Terezës, për dy orë në sheshin “Nënë Tereza”. Ky koncert shënon edhe 27-vjetorin e koncertit të parë që ka dhënë në Shqipëri çifti i këngëtarëve Al Bano dhe Romina Power.
Po në këtë ditë, këngëtari do të marrë nënshtetësinë shqiptare, çelësin e kryeqytetit dhe do të shpallet “Personalitet i shquar i Qarkut të Vlorës”.
Organizatorët njoftojnë se do të çelin edhe një ekspozitë në nderim te këngëtarit, me rastin e Shenjtërimit të Nënë Terezës.
“Albano ka lidhje te ngushta me bamirësen shqiptare. Nënë Tereza i ka bekuar vajzën Kristel pas lindjes, këngëtari ka marrë medaljen e Nënë Terezës, që e mban gjithmonë me vete, emri tij, simbolizon Shqipërinë dhe merr nënshtetësinë shqiptare”, pohon shkrimtarja dhe gazetarja Zenepe Luka.
Al Bano dhe Romina Power u bashkuan për të kënduar në 1975-n, ndërsa u martuan më pas. Ata ishin shumë të suksesshëm në Itali dhe përreth Europës në vitet 1980 deri në vitet 1990. Mes hiteve të tyre të njohura botërisht janë, “Felicità”, “Sharazan”, “Tu, soltanto tu “, “Ci sarà”, “Sempre sempre” dhe “Libertà!”.
*Shfleto galerinë
