Më 27 maj, duke parë situatën e përmirësuar në vend, Komiteti Teknik i Ekspertëve njoftoi lehtësimin e masave duke shtyrë nga 1 qershori orën policore në 23:00 dhe heqjen e maskave në ambientet e jashtme.
“1 qershor të hiqet detyrimi për mbajtjen e barrierës mbrojtëse në ambiente të jashtme dhe të hiqet mbajta e maskës në ambiente të mbyllura. Nga 1 qershori ora policore nga 22:00 do të kalojnë në 23:00. Nga 15 qershori grumbullimi do lejohet 15 persona në ambientet e jashtme. Nga 1 korriku nëse situata do vijojë e kontrolluar ora policore do shtyhet në orën 24:00”, tha Rakacolli.
Më tej zv.ministrja e Shëndetësisë, Mira Rakacoli u shpreh se situata në vendin tonë paraqitet e kontrolluar. Drejtoresha e ISHP-së, Albana Fico i kërkoi qytetarëve që të vijojnë të respektojnë rregullat.
“Numri i shtrimeve spitalore vijon të mbetet i ulët. Për disa javë po bie pozitiviteti i mostrës që është nën 1%. Një ndihmesë ka qenë edhe vaksinimi. Ai po shkon me ritme të shpejta. Pandemia nuk ka përfunduar, por është e rëndësishme të mbajmë maskën, distancën, higjienën dhe të mos harrojmë që të gjithë personat që kanë shenja t’i referohen mjekut të familjes”, tha Fico.
Gjatë këtyre ditëve, situata e pandemisë në vend ka qenë tepër e normalizuar. Shifrat e të infektuarve në ditë janë shumë të ulëta dhe fatmirësisht s’ka pasur asnjë humbje jete.
Çdo masë tjetër është hequr, grumbullimet vazhdojnë, clubet dhe restorantet janë hapur, ndërkohë që qarkullimi vazhdon të ndalohet në orën 23:00.
S’e dimë arsyen pse Komiteti Teknik i Ekspertëve po vonon kaq shumë për lehtësimin e kësaj mase ose heqjen e saj totale, e cila është mëse e arsyeshme duke parë situatën në vend.
Tashmë është momenti që kjo masë të hiqet dhe t’i kthehemi 100% normalitetit, madje ky vendim është vonuar shumë nga Komiteti Teknik i Ekspertëve!
/Iconstyle.al
