Këngëtarai i njohur shqiptar Aleksandër Gjoka ka rënë në prangat e policisë. Gjoka është arrestuar mbrëmjen e djeshme, pasi është përfshirë në një aksident në zonën e Farkës. Pas aksidentit policia ka mbërritur në vendngjarje dhe i ka bërë artistit testin e alkoolit, ku ka rezultuar se Aleksandër Gjoka ka qenë në gjendje të dehur.
Sa i përket gjendjes së tij, është mësuar se aktualisht këngëtari ndodhet në spitalin e Traumës për të marrë ndihmën mjekësore, sepse ka pësuar disa dëmtime të lehta nga përplasja e makinës. Fatmirësisht dëmtimet janë shumë të lehta dhe Gjoka ndodhet jashtë rrezikut për jetën.
Tashmë pritet që këngëtari të dalë para gjykatës ditët në vijim për t’u njohur me masën e sigurisë. Kjo nuk është hera e parë që Aleksandër Gjoka arrestohet për këtë vepër penale.
Pak kohë më parë këngëtari ra në prangat e policisë, pasi u kap duke drejtuar mjetin e tij në gjendje të dehur. Asokohë ai u arrestua duke drejtuar automjetin në gjendje të dehur, në masën 0.66 mg/l, ndërkohë që shtetasi konsiderohet në gjendje të dehur kur testi del mbi 0.5 mg/l.
Gjoka kërkoi nga trupi gjykues të lihej i lirë dhe të pranohej kërkesa e Prokurorisë për masën e sigurisë “detyrim paraqitje”, duke marrë parasysh edhe koncertet që kishte rezervuar me rastin e Krishtlindjes dhe Vitit të Ri, sepse ngjarja ndodhi në prag të festave të fundvitit.
