Bebe Rexha zbuloi ditën e djeshme një surprizë të madhe që e kishte paralajmëruar prej kohësh. Ajo tregoi se në datë 7 maj do të publikojë albumin e saj të ri me titull “Better Mistakes”. Këngëtarja publikoi një kopertinë të albumit, në të cilën ajo shihej e veshur me një trupore të plotë bardhë e zi. Këngëtarja kishte plot 3 vite që nuk kishte sjellë asnjë album dhe kishte kohë që po përgatitej për këtë moment.
Pasi zbuloi lajmin e madh, Bebe publikoi një video të saj, në të cilën shfaqej duke qarë nga lumturia.
“Po qaj me të vërtetë. Kanë kaluar 3 vite me koronavirusin dhe gjithçka. Është thjesht wow! Më në fund. Po e bëj me të vërtetë këtë gjë. Jam shumë gati”, shprehej Bebe në video, teksa tregonte lotët e saj.
Ndërkohë sot ajo ka zbuluar gjithë detajet për albumin e ri, duke nisur nga bashkëpunimet me emra të njohur të muzikës tek titujt e këngës. Ajo ka treguar se për këtë album ka bashkëpunuar me Travis Barker, Ty Dolla $ign, Trevor Daniel, Doja Cat, Rick Ross etj. “Better Mistakes” do të ketë në total 13 këngë dhe 3 prej tyre do të jenë bashkëpunime me artistët e tjerë të njohur. Ka mbetur më pak se një muaj që albumi të publikohet dhe ne po presim me padurim t’i dëgjojmë gjithë këngët.
Kujtojmë se gjatë karrierës së saj, Bebe ka hedhur në treg 3 albume. I pari ka qenë në vitin 2015 me titull “I don’t wanna grow up”. Albumi tjetër “All your fault” u publikua në 2017-n në dy pjesë. Ndërsa albumi i fundit u publikua në 2018-n me titull “Expectations”.
