Mëngjesi i ditës së sotme nisi me një ngjarje tragjike në Rrogozhinë. Tre makina u përfshinë në një aksident automobilistik, i cili ju mori jetën 3 personave.
Deri më tani policia ka konfirmuar 3 viktima nga aksidenti i rëndë, Bajram dhe Merushe Koni, si dhe Tonin Mhilli. Ky i fundit ishte oficer i burgut të Peqinit dhe sot ishte nisur për në punën e tij, por rruga ju ndërpre në mes. Tonin Mhilli, 58 vjeç, ishte babai i gazetares së njohur të televizionit, Valbona Mhilli.
Pas ngjarjes tragjike, Valbona ka bërë një postim shumë prekës në rrjete sociale. Ajo ka publikuar foton e një shiriti të zi dhe ka bërë një dedikim përlotës për të atin.
“Pse ike o ba pa mua? Pse e doje punën më shumë se ne o baaa, pse o komisari i jetës sime, o dashuria ime, o drit, o jeta ime, i le ëndrrat në mes, o baaa çohu”, shkruan Mhilli.
Ajo ka publikuar dhe disa video të mëparshme që ka bërë me të atin dhe të gjithë miqtë në rrjete sociale i kanë shprehur ngushëllimet.
Ngjarja e rëndë ndodhi mëngjesin e sotëm, ku tre makina u përplasën me njëra-tjetrën. Si pasojë e përplasjes mbeti i vdekur në vend oficeri i burgut Toni Mhilli, ndërsa 2 viktimat e tjera ndërruan jetë në spital.
Policia ka shoqëruar njërin prej drejtuesve të mjeteve të përfshira në aksident, Endrin Lilën. Policia ka nisur hetimet për zbardhjen e ngjarjes, ndërsa paraprakisht dyshohet se shkak i aksidentit të jetë bërë parakalimi i gabuar i njërit prej mjeteve.
