Komiteti Teknik i Ekspertëve ka bërë një mbledhje ditën e sotme dhe ka vendosur se çfarë do të ndodhë në vijim në vendin tonë në lidhje me masat kufizuese për pandeminë. Duke parë zhvillimin e situatës, Komiteti ka vendosur që të mbeten në fuqi të njëjtat masa. Edhe pse pritej që orari i kufizimit të ndryshonte nga ora 20:00 në 18:00, kjo gjë nuk ka për të ndodhur. Gjithashtu do të vijojë mësimi online në gjimnazet e vendit.
“Duket se situata në vend është delikate një situatë që meriton vëmendje por duket se nga shifrat kemi një situatë të qëndrueshme dhe në ditët e fundit ka një tendencë ulje të indikatorit R nga 1.1 në 1.05. Masat që u propozuan para dy javësh kanë dhënë efekt. Ne do të vijojmë të mbetemi aty duke i vlerësuar ngushtësisht në kohë të shkurtër. Pra në masat që vazhdojnë të mbeten në fuqi, është kufizimi i lëvizjes së qytetarëve në orën 20:00, mësim online në gjimnaze”, tha Mira Rakacolli.
E pyetur nga gazetarët në sallë rreth përgjigjeve për muatacionet e koronavirusit, kryetarja e Komitetit Teknik të Ekspertëve, Mira Rakacolli tha se ende nuk ka një përgjigje nga laboratori në Britaninë e Madhe.
“Është një vëmendje shumë e madhe e jona, po i ndjekim, kemi komunikime të vazhdueshme me laboratorin në Londër. Fatkeqësisht nuk kemi akoma një përgjigje. Jemi të gjithë tejet të interesuar. Nuk është një gjë që nuk varet nga ne”.
