Ditë më parë, kryeministri, Edi Rama, kishte paralajmëruar se këtë të dielë do të bëhej vaksinimi i personaliteteve shqiptare të moshuar mbi 80 vjeç, dhe ashtu ndodhi.
Në mëngjes, në stadiumin “Air Albania”, u panë të mbërrijnë Tinka Kurti, Sherif Merdani, Pirro Milkani, Alfred Moisiu, Reshat Arbana, Aleksandër Meksi Margarita Xhepa, Dhimitër dhe Roza Anagnosti, Besim Elezi, Fedhon Meksi. Këto personalitete të shquar janë ato që sot morën dozën e parë të vaksinës.
Ndërkohë, kryeministri Rama ka deklaruar se brenda marsit do të vijnë 40 mijë doza Pfizer.
Në mesin e personaliteteve të artit që morën sot dozën e parë të vaksinës anti-Covid, ishte dhe kineasti Piro Milkani.
Pasi bëri vaksinën, ai foli për mediat dhe u shpreh i kënaqur. Milkani u shpreh i bindur se vetëm vaksina anti-Covid do të jetë shpëtimi i njerëzimit nga ky virus.
Milkani: “Është një vaksinim fare i thjeshtë, i zakonshëm. Duhet të pres 30 minuta. Unë jam shumë i kënaqur që e kam bërë mbas 6000 qytetarëve të nderuar të republikës së Shqipërisë siç janë mjekët dhe infermierët. Unë them se kam këmbën e mbarë, për ato që janë mbi 80 vjeç. Vaksina është shpëtimi i vetëm i kësaj pandemie të keqe, nëse 100 vjet më para gripi spanjoll shkatërroi njerëzimin, do t’i kthehem jetës normale me vaksinimin”.
