Në shtator të 2020-tës, kur Kosova dhe Serbia nënshkruan marrëveshjen ekonomike në Shtëpinë e Bardhë, u ra dakord që të vendoseshin marrëdhënie diplomatike Kosovë-Izrael. Ky hap kaq i rëndësishëm është zyrtarizuar dhe është cilësuar si një vendim historik.
Ceremonia e nënshkrimit u zhvillua ditën e sotme në mënyrë virtuale dhe marrëveshja u nënshkrua nga ministrja e Jashtme e Kosovës, Meliza Haradinaj-Stublla dhe ministri i Jashtëm i Izraelit, Gabriel Ashkenazi. Në ceremoninë virtuale të nënshkrimit morën pjesë edhe Nënsekretari amerikan i Shtetit, Matthew Palmer dhe ambasadorët amerikanë në Prishtinë dhe në Jerusalem.
“Vendosja e marrëdhënieve diplomatike ndërmjet Kosovës dhe Izraelit është një hap i rëndësishëm, historik dhe emocionues. Sot në mëngjes mora një kërkesë zyrtare për hapjen e ambasadës së Kosovës në Jerusalem dhe padyshim e miratova dhe mezi pres ta shoh të hapet, shpresoj shumë shpejt”, tha ministri Izraelit Ashkenazi për vendosjen e marrëdhënieve diplomatike.
“Kosova ka pritur gjatë arritjen e kësaj marrëveshjeje, e cila e bën Izraelin shtetin e 117 që e njeh Kosovën. Në këtë ditë të rëndësishme ne hapim një kapitull të ri në lidhjen historike ndërmjet vendeve tona, të cilat janë sfiduar për të ekzistuar si popuj dhe si shtete. Shtetet tona kanë qëndruar pranë njëri-tjetrit në momentet më të vështira dhe sot fillojmë një udhëtim si dy shtete”, u shpreh ministrja e Jashtme e Kosovës.
Dy ministritë kanë nënshkruar memorandum edhe për konsultime politike dhe për bashkëpunim zhvillimor.
Të dy ministrat falenderuan edhe SHBA-të që ndihmoi në vendosjen e marrëdhënieve diplomatike mes dy shteteve. Në lidhje me këtë lajm të madh nuk mungoi as reagimi nga ambasada amerikane.
“Kur partnerët tanë janë të bashkuar, Shtetet e Bashkuara janë më të forta. Urime #Kosovë & #Izrael”, shkruan Ambasada Amerikane në një postim në Facebook.
When our partners are united, the United States is stronger. Congratulations #Kosovo & #Israel. ??????
Posted by U.S. Embassy Pristina, Kosovo on Monday, 1 February 2021
Ndërsa kryeministri në detyrë i Kosovës, Avdullah Hoti, që nënshkroi edhe marrëveshjen në Shtëpinë e Bardhë me Serbinë u shpreh në një deklaratë:
“Me vendosjen e marrëdhënieve diplomatike me Izraelin, shteti i Kosovës, shënon konsolidim në arenën ndërkombëtare duke krijuar miq edhe në Lindjen e Mesme”. Ai tha se ky zhvillim e thyen bllokadën e njohjeve për Kosovën, duke shtuar se krahas dokumentit për marrëdhënie diplomatike, Kosova dhe Izraeli kanë nënshkruar edhe disa marrëveshje tjera që fuqizojnë bashkëpunimin ekonomik dhe politik ndërmjet dy vendeve”.
