Udhëheqësit e BE të enjten “dekurajuan me forcë” evropianët nga udhëtimet jo-thelbësore dhe paralajmëruan se kufizime më të ashpra në lëvizje mund të vijnë brenda pak ditësh nëse përpjekjet për të frenuar koronavirusin do të dështonin. Presidentja e Komisionit Europian Ursula von der Leyen dhe Presidenti i Këshillit Europian Charles Michel dhanë këtë paralajmërim pas një samiti katër orësh të zhvilluar virtualisht me krerët e 27 shteteve përbërëse.
Toni i urgjencës u ndez nga frika për përhapjen e varianteve shumë ngjitëse të koronavirusit që mund të çonin në nivele të larta infeksioni dhe në tejmbushjen e spitaleve, siç po ndodh në Britaninë e Madhe.
Michel tha: “Do të jetë ndoshta e nevojshme të merren masa shtesë për të kufizuar udhëtimet jo-thelbësore dhe ky është orientimi që ne po marrim. Koordinimi i mëtejshëm mbi këtë çështje do të bëhet në “ditët e ardhshme. BE donte të shmangte një përsëritje të valës së parë, në mars të vitit të kaluar, kur disa vende anëtare u kapën nga paniku dhe mbyllën kufijtë kombëtar në mënyrë të njëanshme, duke shkaktuar dhe kaos ekonomik.”
Për të shmangur mbylljen e kufijve brenda BE-së në zonën Shengen, testimi duhet të rritet. Një nga skenaret e mundshme është se nga e diela, çdokush që mbërrin nga jashtë BE – vetëm për ata me arsye thelbësore – duhet të ketë bërë testin Covid-19. Brenda BE-së, disa vende do të aplikojnë testimin paraprak për udhëtime ndërkufitare që nuk hyjnë në kategoritë thelbësore siç janë punëtorët dhe shoferët e kamionëve.
Nga e diela Franca do të kërkojë një test negativ PCR për 72 orët e fundit siç deklaroi Presidenti Emmanuel Macron Këshillit Evropian.
Përhapja e një varianti të ri në Portugali
Samiti gjithashtu mbështeti përdorimin më të gjerë të testeve të shpejta në situata të tjera që vlerësohen me rrezik të ulët. Këto teste, shpesh duke përdorur mostra të pështymës, janë më të lira dhe më të shpejta – megjithëse më pak të besueshme – sesa testet e PCR. Takimi i së enjtes filloi pasi Qendra Evropiane për Parandalimin dhe Kontrollin e Sëmundjeve tha se ekziston një probabilitet “shumë i lartë” i përhapjes së varianteve më ngjitëse në Bashkimin Evropian.
Këto mutacione – të cilat u shfaqën në Britani, Afrikën e Jugut dhe Brazil – kanë nxitur tashmë ndalime ose kufizime për udhëtarët nga ato vende. Belgjika – e gjendur midis Gjermanisë, Francës dhe Hollandës -ka kërkuar një mbyllje “të përkohshme” gjatë periudhës së pushimeve të shkurtit. Kancelari austriak Sebastian Kurz gjithashtu kishte shprehur mbështetje “për kontrollet më të rrepta dhe kërkesat për teste të udhëtarëve për të kontrolluar mutacionet e virusit”.
Por, Portugalia po shërben si një paralajmërim i hershëm i asaj që mund të vijë. Qeveria e saj urdhëroi që shkollat të mbyllen për dy javë për shkak të përhapjes së shpejtë të variantit britanik, për të cilin kryeministri Antonio Costa tha se përbënin 20 përqind të infeksioneve dhe mund të përbënte 60 përqind sa më shpejt që javën e ardhshme.
Ndërsa nuk kishte asnjë indikacion që variantet e reja ishin më vdekjeprurëse, kishte shqetësime se përhapja e tyre mund të mbingarkonte kapacitetet e kujdesit intensiv të spitaleve.
Certifikatat e vaksinave
Pas një fillimi zhgënjyes të ngadaltë të vaksinimit në BE, Komisioni Evropian ka kërkuar me shpejtësi më të madhe nga vendet anëtare. Pritet që së shpejti të autorizojë më shumë vaksina përtej BioNTech / Pfizer dhe Moderna që po injektohen aktualisht dhe synon të vaksinojë 70 përqind të të rriturve në BE përpara shtatorit.
Udhëheqësit diskutuan gjithashtu për çertifikatat e vaksinave, diçka që vendet e varura nga turizmi si Greqia shpresojnë se mund të lehtësojnë kufizimet e udhëtimeve dhe të shpëtojnë atë që duket si një tjetër periudhë katastrofike e pushimeve të verës. Por udhëheqësit e BE vendosën që ishte shumë herët dhe mbeten shumë pyetje që një certifikatë e tillë të përdoret si diçka më shumë sesa një regjistër shëndetësor.
