Pasi Maks Velo u nda nga jeta në maj të vitit të shkuar, Ministria e Kulturës vendosi që shtëpinë e tij ta shpallte Monument Kulture të kategorisë së II. Mirëpo ky vendim është shfuqizuar nga Gjykata e Tiranës pas një padie që ka ngritur nipi i Maks Velos, i cili është edhe trashëgimtar i tij.
Paditësi, pra nipi i Velos, i është drejtuar gjykatës duke pretenduar se i është cenuar e drejta e pronësisë së tij. Report Tv raporton se nuk është respektuar parimi i ligjshmërisë, parimi i transparencës, parimi i informimit, parimi i ushtrimit të ligjshëm të diskrecionit, parimi i proporcionalitetit, i drejtësisë dhe paanësisë, parimi i objektivitetit, përgjegjësisë dhe deburokratizimit dhe i eficencës.
“Nuk e kuptojmë se si ky proces mund të ndodhë paraprakisht, kur në fakt duhet të ishte një proces invers. Kuptojmë që kjo nismë erdhi si pasojë e një emocioni të momentit dhe ndoshta për të treguar se sa shumë e donim dhe vlerësonim të ndjerin xhaxha, por duket qartazi që është një nismë jo vetëm e pamenduar mirë, por në kufijtë e talljes dhe të papërgjegjshmërisë”, është shprehur në padinë e ngritur trashëgimtari i Velos.
Në mënyrë që një ndërtesë të shpallet Monument Kulture i kategorisë së II duhet të spikasë për vlerat arkitektonike dhe për pamjen e jashtme. Sipas paditësit shtëpia ku ka jetuar Velo, nuk e ka ndërtuar ai e as ndonjë arkitekt i njohur dhe nuk rezulton të ketë ketë ndonjë vlerë të veçantë për pamjen e jashtme. Për këtë arsye ai ka sugjeruar që deklarohej si monument kulture një godinë që mban firmën e Mas Velos dhe jo shtëpia që nuk vlerë arkitektonike.
Gjykata ka vlerësuar se Ministria e Kulturës nuk ka respektuar standardet e procesit të rregullt ligjor, sepse nuk i kanë dhënë mundësi paditësit për t’u dëgjuar dhe mbrojtur në këtë proces, që në thelb kufizon të drejtën e pronësisë. Për këtë arsye gjykata ka shfuqizuar Urdhrin nr. 163, date 08.05.2020 “Per deklarimin e pasurise kulturore te objektit “Banesa ku ka jetuar Maks Velo, rruga “Hoxha Tahsim”, nr. 57/2” Tirane”, i Ministrit të Kulturës dhe vendimin nr. 130 datë 08.05.2020 dhe i Këshillit Kombëtar të Trashëgimisë Kulturore Materiale, sepse janë në kundërshtim me ligjin nr. 27/2018, “Për trashëgiminë kulturore dhe muzetë”.
