Qeveria holandeze dha dorëheqjen ditën e premte duke pranuar përgjegjësinë për akuzat e gabuara të autoriteteve tatimore se 10 mijë familje kishin mashtruar për subvencionet e kujdesit për fëmijët. Këto subvencione jepen nga shteti holandez në formën e një pagese sociale mujore që prindërit ose kujdestarët të përballojnë rritjen e fëmijëve. Ky skandal i madh çoi shumë familje drejt shkatërrimit financiar, ndaj qeveria u detyrua të dorëhiqej.
Megjithatë kryeministri Mark Rutte deklaroi se qeveria e tij do të vazhdojë të qëndrojë në krye të vendit për të menaxhuar krizën e koronavirusit.
“Reth dhjetëra mijëra prindër u shtypën nën rrotat e shtetit. Nuk mund të ketë dyshim, kjo është një njollë kolosale”, ka thënë Rutte për mediat. Ai e ka bërë të qartë se gjëja e parë që duhet rregulluar është kompensimi financiar për të gjitha familjet e prekura nga ky skandal.
Një hetim parlamentar zbuloi muajin e kaluar se zyrtarët në shërbimin tatimor kishin akuzuar gabimisht familjet për mashtrim mbi subvencionet e kujdesit për fëmijët, duke shkaktuar një padrejtësi të paprecedentë. Rreth 10 mijë familje ishin detyruar të paguanin dhjetëra mijëra euro secila, në disa raste duke çuar në papunësi, falimentime dhe divorc. Shumë nga familjet u vunë në shënjestër bazuar në origjinën e tyre etnike ose kombësinë e dyfishtë.
“Asnjëherë nuk është e pranueshme, që një dikush të ndjejë se po diskriminohet për shkak të kombësisë, racës, gjinisë ose orientimit seksual. Kjo është absolutisht e papranueshme në një shtet të bazuar në ligj”, ka thënë Rutte.
Zgjedhjet e tjera janë planifikuar për në 17 mars, në fund të mandatit të tretë të Rutte. Rutte ka qenë në pushtet për më shumë se një dekadë, duke marrë drejtimin në tetor 2010. Nëse partia e tij do të fitojë sërish zgjedhjet pas dy muajsh, ai do të formojë një administratë të re.
