“Zili, zili, Inatin mrena nshpirt e kini, Smun dashni me dhon Kur n’zemër tane ki veq zili, zili!”
Dafina Zeqiri goditi me këtë këngë të publikuar më 22 tetor 2020, që menjëherë shkaktoi goxha bujë në rrjetet sociale. Nuk iu desh më shumë se një tekst i goditur me mesazhe therëse, e një paraqitje e gjetur skenike siç vetëm Duffye di, që të gjithë të bëheshin lëmsh.
Mes shumë komentesh, versioni më i përhapur nga fansat dhe mediat ishte se “ ‘Zili zili’ është diss për Taynën”, nisur nga fakti se raportimet për prishjen e marrëdhënies së tyre ishin ende të freskta asokohe.
Megjithatë, Dafina nuk reagoi asnjëherë ndaj këtyre zërave, teksa spekulimet vazhduan e vazhdojnë, ndonëse në këngë nuk përmendet asnjë emër, çka do ta kthente atë automatikisht në një diss. Kur të gjithë ju po prisni me padurim të dini se si qëndron e vërteta, Dafina ka vendosur të thyejë heshtjen dhe të sqarojë për “iconstyle.al” se si qëndron e vërteta e kësaj kënge, duke vendosur pikat mbi “i” një herë e mirë.
Në deklaratën e saj, autorja e shumë hiteve shprehet se nuk i ka bërë diss askujt, sidomos femrave, të cilat siç shprehet ajo, është munduar gjithnjë t’i përkrah. Teksa shton se të depërtosh në botën e showbizit shqiptar është shumë e vështirë, Dafina shprehet se ka vite në industri para se të ekzistonte edhe Instagrami me Youtube-in, të cilët e lehtësojnë rrugët drejt famës.
S’i kam bërë diss askujt, asnjëherë, sidomos femrave. I kam mbështetur ato që janë në showbiz, sidomos ato që kanë qenë në hapat e para sepse e di që është vështirë dhe gjithmonë kam qenë feministe dhe kam dëshirë t’i mbështes sepse e di sa e vështirë është në këtë showbiz. Kam shumë vite këtu, edhe para se të ishte Instagrami. Po ashtu, para edhe se të ishte YouTube siç është sot.
Megjithatë, ajo nuk i mohon përpjekjet për diss nga artistet e tjera ndaj saj, duke shtuar se vetë distancohet nga këto veprime të cilat nuk i konsideron shembull për gjeneratën e re.
Dhe më vjen keq për ato femra që kanë bërë thirrje për mbështetje dhe më pas kanë kthyer shpinën me diss-a. Kjo nuk është shembull për gjeneratën e re dhe unë s’kam pjesë me qenë pjesë e rrethanave të atyre njerëzve.
Fjalën e saj Dafina e mbyll me një mesazh shumë të bukur, duke u bërë thirrje gocave dhe grave të frymëzohen dhe të mbështesin njëra-tjetrën me vetëm një qëllim: Ta ngrejnë njëra-tjetrën sa më lart.
Misioni im në këtë botë si Dafina Zeqiri normal që nuk ka përfunduar dhe nuk do përfundoj shpresoj as pas vdekjes sime. Dhe shpresoj që ka shumë femra të tjera që vazhdojnë të inspirohen dhe mbështesin njëra-tjetrën si për interes ose pa interes. Po çfarëdo interesi të jetë, le të jetë i mirë që ta ngrejmë sa më lart njëra-tjetrën. Dhe jo të kundërtën.
Pas këtyre fjalëve çdo koment do ishte i tepërt dhe shpresojmë që të jeni sa më të qartë tani!
