Ditën e djeshme SHBA-ja u përfshi nga një protestë masive e thirrur nga Donald Trump në mënyrë që të ndalohej çertifikimi i votave të Kolegjit Zgjedhor. Në protestë protestuesit thyen kordonin policor dhe shkatërruan çdo gjë që i doli përpara, duke u futur edhe brenda ndërtesë së Kapitolit.
Gjithashtu nga hetimet janë gjetur të paktën 2 pajisje shpërthyese që pretendohej të hidheshin në drejtim të Kapitolit. Gjatë trazirave të djeshme 4 persona mbetën të vdekur si dhe shumë të tjerë u plagosën për shkak të dhunës.
Së fundmi, drejtuesi dhe themeluesi i Facebook Mark Zuckerberg, me anë të një postimi në rrjetet sociale ka bërë të ditur se llogaritë e Donald Trump në kompanitë që ai ka në zotërim do të vijojnë të qëndrojnë të mbyllura për një kohë të pacaktuar.
Reagimi i Facebook, vjen në një kohë kur edhe Twitter bllokoi pjesërisht llogarinë e ish-presidentit amerikan, me kushtin që disa postime të tij që konsideroheshin shkelje, të fshiheshin. Po ashtu, Mark Zuckerberg shprehet se ditën e djeshme, presidenti e përdori platformën e tij për “të nxitur kryengritje të dhunshme kundër një qeverie të zgjedhur në mënyrë demokratike.”
POSTIMI I PLOTË
“Ngjarjet tronditëse të 24 orëve të fundit tregojnë qartë se Presidenti Donald Trump synon të përdorë kohën e tij të mbetur në detyrë për të minuar tranzicionin paqësor dhe të ligjshëm të pushtetit te pasardhësi i tij i zgjedhur, Joe Biden.
Vendimi i tij për të përdorur platformën e tij për të falur dhe jo për të dënuar veprimet e mbështetësve të tij në ndërtesën e Kapitolit ka shqetësuar me të drejtë njerëzit në SHBA dhe në të gjithë botën. Ne i hoqëm këto deklarata dje sepse gjykuam se efekti i tyre – dhe me gjasë qëllimi i tyre – do të ishte të provokonin dhunë të mëtejshme.
Pas certifikimit të rezultateve të zgjedhjeve nga Kongresi, përparësia për të gjithë vendin duhet të jetë tani të sigurojë që 13 ditët e mbetura dhe ditët pas inaugurimit të kalojnë në mënyrë paqësore dhe në përputhje me normat e vendosura demokratike.
Gjatë disa viteve të fundit, ne e kemi lejuar Presidentin Trump të përdorë platformën tonë në përputhje me rregullat tona, herë pas here duke hequr përmbajtje ose duke etiketuar postimet e tij kur ato shkelin politikat tona. Ne e bëmë këtë sepse besojmë se publiku ka të drejtë për qasje sa më të gjerë në fjalimin politik, madje edhe në fjalimin e diskutueshëm. Por konteksti aktual është tani thelbësisht i ndryshëm, duke përfshirë përdorimin e platformës sonë për të nxitur kryengritje të dhunshme kundër një qeverie të zgjedhur në mënyrë demokratike.
Ne besojmë se rreziqet e lejimit të Presidentit të vazhdojë të përdorë shërbimin tonë gjatë kësaj periudhe janë thjesht shumë të mëdha. Prandaj, ne po zgjatim bllokun që kemi vendosur në llogaritë e tij në Facebook dhe Instagram për një kohë të pacaktuar dhe për të paktën dy javët e ardhshme derisa të përfundojë tranzicioni paqësor i pushtetit.”
