Instituti i Statistikave, nëpërmjet shifrave zyrtare, ka treguar se numri i individëve që jetojnë jashtë territorit të Shqipërisë është rritur me 2.6% gjatë vitit 2019, ndërkohë që shifrat përgjatë këtij viti “pandemik”, pritet të jenë më të larta.
Sipas INSTAT, numri i vlerësuar i diasporës arrin në shifrën 1.684.135 individë ku nga këto 884.719 janë meshkuj dhe 799.416 janë femra.
Nëpërmjet përllogaritjeve, rezulton se diaspora përbëhet nga një popullsi relativisht e re ku pjesën më të madhe e zë mosha 15 deri në 64 vjeç.
Sakaq nga të dhënat shohim se numri i individëve ka ardhur duke u rritur nga viti 2019 në vitin 2020 me 2.6% për meshkujt dhe 2.7% për femrat.
Rritja e numrit të përgjithshëm të emigrantëve shkon në mazhin e 42.781 individë.
Ndërkohë përsa i përket shpërndarjes së emigrantëve nëpër vendet kryesore shohim gjithashtu ndryshime nga viti në vit.
Vendi kryesor ku është përqëndruar diaspora shqiptare e Shqipërisë, është Greqia e ndjekur më pas nga Italia, edhe pse në vitin 2019 numri i emigrantëve në Greqi ka rënë.
E njëjta gjë ka ndodhur edhe në Itali, ku shikohet një rënie e lehtë prej 0.2%.
Në vende si SHBA-ja, Gjermania, Belgjika, Kanadaja dhe Mbretëria e Bashkuar numri i emigrantëvë për vitin 2019 është rritur.
Të dhënat tregojnë se emigracioni shqiptar është i dominuar nga faktorë ekonomik, pra arsyet ekonomike janë arsyet kryesore pse shqiptarë largohen nga vendi i tyre.
83.7% e individëve largohen për arsye punësimi dhe 3.5 % largohen për arsye të studimeve. Në arsyen për studime përfshihet kryesisht grupmosha 18-25 vjeçare.
Pavarësisht shifrave të publikuara nga INSTAT e cila i referohet dy censeve të njëpasnjëshëm, duhet pasur parasysh se shqiptarët vendbanues nuk regjistrohen sistematikisht kur largohen nga vendi dhe duke qenë se ka pak fushata nxitëse që ata të regjistrojnë largimin te autoritetet vendore, nuk ka ende një matje të besueshme të numrit të individëve që janë larguar nga Shqipëria./Iconstyle.al/
