Presidenti i zgjedhur i SHBA, Joe Biden, ka bërë live vaksinën kundër koronavirusit mbrëmjen e djeshme. Ai është vaksinuar këtë të hënë, ku siç shihet dhe në video, në krah të tij qëndron bashkëshortja Jill Biden.
Duke dhënë shembull për qytetarët njëlloj si figura të tjera publike, Biden-it iu injektua doza e parë e vaksinës së Pfizer gjatë një transmetimi televiziv.
President-elect Biden receives his first dose of the Pfizer vaccine. pic.twitter.com/Ou7u2x8qZb
— The Recount (@therecount) December 21, 2020
Presidenti i zgjedhur është vaksinuar në spitalin Christiana Care dhe injektimi i është bërë nga Tabe Masa, infermiere dhe drejtuese e Shërbimeve Shëndetësore të Punonjësve.
“Ajo që unë dua të them është se ua kemi shumë borxh këtyre njerëzve. Shkencëtarët dhe njerëzit që e bënë këtë të mundur, punonjësit e vijës së parë, njerëzit që ishin ata që në të vërtetë bënë punën klinike, kjo është thjesht e mahnitshme. Do të doja të kishim kohë për të shkuar në të gjithë spitalin për të parë sa të zënë dhe të pabesueshëm që jeni të gjithë. Dhe ju detyrohemi shumë”, ka thënë Biden pasi ka bërë vaksinën.
Ky lloj vaksinimi në sytë e të gjithëve është bërë në mënyrë që t’u tregohet amerikanëve që vaksinat janë të sigurta.
Vaksinimi i popullsisë në SHBA ka nisur 14 dhjetor me punonjësit e shëndetësisë të parët dhe personat që janë më shumë të rrezikuar. Deri tani janë vaksinuar mbi 1.6 milion persona në të gjithë SHBA.
