Meriton Mjekiqi duket se nuk ka ndërmend t’i ndahet Noizyt dhe konfliktit të tyre në distancë.
Dy ditë më parë teksa ishte i ftuar në emisionin “Wake Up”, Meritoni tha se Noizy u prek nga një e vërtetë që i tha Big Kik dhe me këtë rast deshi të fitonte vëmendje.
“Unë nuk kam pasur kurrë asnjë problem me label, me grupe, menaxhera. Kur të tjerët kanë problem me veten dhe mundohen të gjejnë rastin të ngrihen akoma më shumë duke kërkuar vëmendje dhe duke mos e pranuar realitetin që të tjerët thonë për ty, atëherë nuk është reale. Jemi njerëz gabojmë dhe kur dikush thotë realitetin si puna e Big Kik që tha për Noizy-n dhe që është prekur dhe që ka nxjerr një postim me ‘Noizy Black’ a çfarë ka bërë se nuk e di. Se të them të drejtën nuk merrem se kam shumë punë, kam shumë plane të tjera për ta ngritur emisionin në një nivel tjetër”, tha Meritoni.
Mbrëmjen e sotme ai ka folur sërish rreth reperit pasi ishte i ftuar në “Binjakët show” me Romeon dhe Donald Veshajn.
I gjendur përballë një loje ku i drejtoheshin pyetje lidhur me disa reperë shqiptarë Meritoni zgjodhi dy herë Noizyn, një herë si “artisti më i keq” dhe një herë tjetër si “artistin që s’do e ftonte kurrë në emision”.
Nuk e dimë nëse kjo do pasohet nga një debat tjetër virtual, por moderatori sapo i hodhi benzinë zjarrit.
Kujtojmë se e gjitha nisi para disa javësh kur fillimisht Noizy dhe reperi i ri Big Kik u përfshinë në një debat publik, pasi ky i fundit u shpreh gjatë një freestyle në “Gjoni Black Entertainment” se Noizy e kishte hequr pa asnjë arsye nga grupi “OTR”. Përgjigja e Noizy-t nuk vonoi dhe në këtë përplasje virtuale ai përfshiu edhe moderatorin e emisionit , Meriton Mjekiqin.
“A ka emision që nuk përmendet Piktura madhe? Noizy’s show. Kush mund ta bëj një përmbledhje sa here është përmendur emri im në atë emision? Bashkë me sa herë është fol ose janë gjujt kunja kundra meje? Ma shumë herë sa ka pas të ftum besoj. Më fal qe s’ta kam pranu ftesën m’ke shkrujt nja 10 her. Po sja vlen. Po nuk u permend Noizy s’ka lajm..ai emision është bo për mu nëse nuk e keni vënë re Noizy,Noizy,Noizy,Noizy. E di qe ju dhemb suksesi im por ky ka qenë plan i zotit jo i imi dhe krejt estrada të bëhet bashkë s’mund ta ndryshojë këtë. I’m unstoppable”, shkroi Noziy.
Më pas reperi publikoi një foto të nga studioja e emisionit, ku dallohej se e kishte modifikuar emrin e tij nga “Gjoni Black Entertainment” në “Noziy Black Entertainment”. I menjëhershëm ishte edhe reagimi i Meriton Mjekiqit.
“Faleminderit shumë që çdo të dielë e pret me pa durim emisionin ‘Gjoni Black’”, shkroi ai në një postim. Më pas publikoi foton e një ilaçi “Oki” dhe shkroi “Kalon” shoqëruar me një emoji duke qeshur me lot.
