Vrasja e Klodian Rashës ka shkaktuar reagim të madh publik dhe qytetarët janë ngritur në protesta.
Mbrëmjen e sotme ata e nisën protestën e tyre në sheshin ‘Skëndërbej’, dhe më pas lëvizën drejt Kryeministrisë. Pjesëmarrësit në këtë protestë janë të grupmoshave të ndryshme, dhe jo vetëm të rinj.
Ndërkohë ditën e sotme, policia ka paralajmëruar se do të ndërhyjë në çdo rast kur do të ketë grumbullime, ndryshe nga 5 ditët e para të protestës kundër vrasjes së Klodian Rashës, i cili u ekzekutua me armën e shërbimit nga një efektiv policie, ku ka lejuar grupimet. Struktura e posaçme Shqiponja është e përgatitur për t’ju paraprirë çdo situatë.
Një protestuese e cila është bërë pjesë në natën e gjashtë të protestës për vrasjen e Klodian Rashës thotë se pjesëmarrësit e saj po arrestohen nga policë civilë që nuk prezantohen dhe janë të paidentifikueshëm. Ajo shprehet se vrasja e Klodianit nuk është e rastësishme.
Ndërkohë Gjykata e Tiranës ka dhënë masën e sigurisë për 24 protestues të ndaluar nga ana e policisë, në demonstratën për vrasjen e të riut Klodian Rasha.
Nga ana e gjykatës janë dhënë 4 masa sigurie “arrest me burg”. Po ashtu, gjykata ka dhënë masën e “arrestit me burg” me afat 10-ditor për 6 protestues.
Gjykata ka dhënë “arrest në shtëpi” për 4 masa sigurie, kurse 10 masa u dhanë “detyrim paraqitje”.
Prej 6 ditësh tashmë, qytetarët e Tiranës po organizojnë një protestë në nder të Klodian Rashës i cili u vra pabesisht nga efektivi duke gdhirë e hëna. Revoltën e tyre qytetarët e kanë shprehur në djegie e shkatërrime objektesh, siç janë pema e Krishtlindjeve, apo koshat e mbeturinave.
Protesta ka patur edhe në qytetet e tjera, por ndryshe nga kryeqyteti, vihet re se kanë qenë më paqësore.
Kreu i qeverisë Edi Rama hoqi përgjegjësinë nga struktura e Policisë së Shtetit dhe e drejtoi atë vetëm te një individ, por në fakt qytetarët e dinë se kjo strukturë është e kalbëzuar, që nga hyrja në këtë strukturë, shmangia e përgjegjësisë, mostrajtimi i duhur në Akademinë e Policisë, etj.
E gjithë struktura nga Drejtoria e Policisë, te Shërbimi i Çështjeve të Brendshme dhe Ankesave deri tek Forcat Shqiponja, të gjithë drejtuesit duhet të largohen. Konkretisht, “iconstyle.al”, duke iu bashkuar nismës së protestuesve dhe kërkesës së tyre, kërkon largimin e :
-Muhamet Rrumbullaku, drejtor i SHÇBA, që manipuloi hetimin.
-Ardi Veliu, drejtori i Policisë së Shtetit.
-Gjovalin Loka, drejtori i Departamentit për Sigurinë Publike, mban përgjegjësi për dhunën ndaj protestuesve.
-Rebani Jaupaj, drejtor i Policisë Tiranë duhet të mbajë përgjegjësi pse policia ishte pa kamera në trup natën e ekzekutimit të Klodianit.
