Protesta për Klodian Rashën ka shkaktuar bujë të madhe dhe përveç risjelljes në vëmendje të faktit se Policia e Shtetit duhet reformuar urgjentisht, ka nxjerrë në pah edhe problematika të tjera, siç është për shembull fakti se media shqiptare janë kthyer në paterica të pushtetit.
Kur kauza e qytetarëve lidhet në fakt me strukturën e Policisë që prej vitesh ka treguar se ka dështuar në misionin e saj. Mirëpo, kur kjo kauzë na përket të gjithë dhe si rrallëherë në vendin tonë është nisur nga të rinjtë dhe pa ngjyra politike.
Mirëpo, ajo që po ndodh është se kjo protestë nuk po pasqyrohet si duhet nga mediat apo figurat publike, që po e zhvendosin fokusin e saj jo aty ku duhet të ishte. Shumë media shkruajnë se protesta e qytetarëve është e dhunshme pasi u dëmtuan dhe dogjën disa objekte, që janë riparuar menjëherë nga Bashkia e Tiranës disa orë më pas, duke dëshmuar se sa të përpërfillshme janë këto dëmtime krahasuar me vjedhjen, dëmtimet, gjymtimet dhe vrasjet që po i bëhen dhe i janë bërë ndër vite popullit shqiptar.
Qartazi këto media pro-qeveritare në raportimet e tyre nuk zbardhin fare protestë, e aq më pak të mbështesin kauzën, por shkruajnë për djegien e pemës së Krishtlindjeve apo për djegien e mbeturinave në koshat e plehrave.
Me përjashtim të shumë pak mediave të pavarura që kanë pasqyruar hap pas hapi gjithë ecurinë e protestës, heshtjen e qeverisë, veprimet e Policisë, pjesa tjetër është pozicionuar nga qeveria duke vendosur në kryetitujt e tyre “dhunën dhe shkatërrimet” e pretenduar se po ushtrojnë të rinjtë.
Propaganda e disa mediave arrin deri aty sa të krahasojnë heqjen e disa dritave nga pema(që e riktheksojmë u rikuperuan menjëherë të nesërmen) me dhimbjen e familjes së Klodianit. Bëri xhiron e rrjetit kjo video ku gazetarja e Top Channel, një nga televizionet më të mëdha kombëtare, thotë se jeta vazhdon normalisht pavarësisht vdekjes së Klodianit.
Qartazi e ndikuar nga politika editoriale e televizionit ku punon, ajo ka bërë një deklaratë që ndoshta nuk donte ta bënte, pasi vetëm një ditë më parë ishte shprehur se lajmi i vdekjes së 25-vjeçarit është një nga lajmet më të vështira që i është dashur të raportojë.
Në fakt, jo! Jeta nuk vazhdon njësoj pa Klodianin! Sepse Klodiani nuk ishte thjesht një i ri 25-vjeçar që iu mor jeta padrejtësisht, por është një fenomen në shoqërinë tonë prej shumë vitesh.
Të tjera shkruajnë për letra fëmijësh drejtuar Ramës, ku kërkojnë pemën e Krishtlindjeve për festa. Por, në fakt pema aty ka qenë gjithmonë.
Pse nuk i publikojnë këto media letrat e fëmijëve të Tiranës që nuk kanë asnjë kënd lojërash? Pse u kujtuan këto media vetëm tani për një pemë? Pse nuk shkruajnë për tenderat e betonizimit?
Të tjera merren me detaje totalisht të parëndësishme, duke u munduar ta shkëpusin vëmendjen e publikut nga ajo që ka rëndësi dhe duke zhvlerësuar kauzën.
Aktivistja e Lëvizjes Vetëvendosja në Shqipëri Megi Mustafaraj shkruan në Facebook se nuk e do Top Channel në protestë. Ajo shkruan se kur protestuesit thërrasin “Rama ik” kamerat e këtij televizioni fiken dhe kur protestuesit marshojnë për diku tjetër fokusojnë vendin, për të treguar se nuk ka njerëz.
Nuk e duam Top Channel-in ne protesta.
Top Channel eshte media e cila i sherben Rames dhe kete e dime. Por te pakten te bejne sikur jane media, jo te dalin aq hapur kunder protestes.
Kur protestuesit therrasin “media e Rames” kameramani murmurit neper dhembe “ik andej o dreq”.
Kur raportojne ne terren fjalen qe perdorin me shume eshte “vandalizem” ose kur protestuesit marshojne per diku tjeter, nuk shkojne pas tyre por,gazetarja ulet ne trotuar sikur po lyp dhe ben kronike sikur nuk ka njerez dhe gjithcka eshte mjerim. Por mjerim eshte vete Topi dhe ata qe e drejtojne.
#nukeduamtopchannelin
Mirëpo, vetëdorëzimi nga ana e tyre është i qartë dhe ka të bëjë me konfliktin e interesit që kanë pronarët këtyre e mediave me qeverinë, të cilët duhet të mbrojnë interesat e bizneseve të tyre. Dhe kjo është e pamundur pa mbështetjen e qeverisë, pa tenderat që jep qeveria, pa lejet e ndërtimit, lejet e ndryshme, konçensionet etj.
Kjo zhvlerëson etikën gazetareske, rolin e medias si një kontrollor demokratik, por edhe lirinë e fjalës, lirinë e informimit dhe kritikës. Nëse nuk e keni mësuar në auditore ose nëse pozicionimi pranë pushtetit ua ka fshirë nga kujtesa, duhet të dini se mediat luajnë një rol jashtëzakonisht të rëndësishëm në shoqëri, duke shërbyer si “watch dog”, çka nënkupton se mediat duhet t’i kërkojnë llogari qendrave të pushtetit dhe të monitorojnë në mënyrë të vazhdueshme autoritetet qeveritare dhe organizatat, institucionet dhe bizneset.
Gjë që ato nuk e bëjnë!!!
Qartazi, prej kohësh media po funksionon përmes një sistemi të deformuar, për shkak të ndërthurjes se interesave financiare të disa pronarëve me pushtetin politik. T’i shërbesh propagandës qeveritare edhe në një moment të tillë, është një nga skandalet dhe turpet më të mëdhaja, i cili nuk ka kaluar pa u vënë re nga publiku, teleshikuesi, lexuesi dhe dëgjuesi shqiptar!
Ku i dihet ndoshta pas reformimit të Policisë së Shtetit, qytetarët mund të bëjnë të mundur edhe reformimin e mediave.
“iconstyle.al” është pozicionuar në krah të protestuesve prej fillimit të protestës, duke kërkuar rindërtimin e strukturës së Policisë së Shtetit, që pason ngulmimin tonë prej muajsh tashmë për një strukturë të reformuar, bashkë me largimin e Sandër Lleshajt.
