UNICEF ka shprehur shqetësimin e tyre mbi dhunën e ushtruar mbi fëmijët dhe të rinjtë gjatë protestave në Tiranë dhe në qytetet e tjera të Shqipërisë.
“UNICEF i bën thirrje gjithë shoqërisë të mbështesë të drejtën e fëmijëve të parashikuar në Konventën e të Drejtës së Fëmijëve për lirinë e shprehjes dhe tubimin paqësor dhe u bën thirrje të gjithë aktorëve të sigurohen që ata fëmijë që vendosen në kontakt me ligjin duhet të marrin në kohë trajtimin dhe mbështetjen e duhur, përmes procedurave të përshtatshme për të mitur.
UNICEF nxit të gjithë shoqërinë që të respektojë masat themelore të sigurisë për Covid-19 dhe të gjithë protestuesit që marrin pjesë në protestë ta bëjnë këtë ngjarje paqësore dhe jo të dhunshme “- shkruhet në deklaratë.
Arrestimi i 13 vjeçarit
Videoja e arrestimit të një të mituri 13 vjeç që u kap në bulevard nga njësia “Shqiponja” ka prekur mbarë publikun.
“Ai thërriste jam 13 vjec”, ndërsa ata nuk donin t’ia dinin për të drejtat e tij.
Janë me dhjetëra fëmijë që po mbahen nëpër qelitë e komisariateve, një pjesë janë cuar edhe në Kavajë, për mungesë dhomash të paraburgimit. Pas protestave ata janë cuar në komisariate ku u është bërë presion, janë rrahur, janë pyetur pa psikologë, pa prindërit, pa avokat.
Raporti i Avokatit të Popullit
Institucioni i Avokatit të Popullit, ka publikuar gjetjet e një raporti paraprak të kryer në komisariatet dhe qendrat shëndetësore të kryeqytetit pas protestave të dy ditëve të fundit. Sipas këtij raporti u vu re se shumë prej personave të shoqëruar për incidentet në protesta ishin të mitur, pjesa më e madhe e të cilëve më pas ishin liruar, ndërsa 2 ishin arrestuar.
Numri i të shoqëruarve ka qenë i lartë: 124 persona, nga të cilët 57 të mitur. Të miturit janë lënë të lirë pas verifikimit të tyre dhe në momentin e inspektimit janë gjendur vetëm 2 të mitur të arrestuar, njëri 16 vjeç dhe tjetri 17 vjeç. Ky është një numër disa herë më i lartë se kapacitetet e shoqërimit dhe ndalimit në drejtoritë vendore dhe komisariatet e kryeqytetit, të cilat kanë mundësi akomodimi vetëm për 33 të shoqëruar dhe rreth 25 të arrestuar.
Dhuna ndaj të miturve
Në momentin e inspektimit ka pasur në total një numër prej 52 të arrestuarish. Nga të ndaluarit, pati një numër pretendimesh për veprime të dhunshme nga ana e punonjësve të Policisë. Gjithashtu Avokati i Popullit ka konstatuar se përgjatë shoqërimeve në Polici të pjesëmarrësve në protestat e fundit, janë shoqëruar edhe disa të mitur nën moshën 14 vjeç dhe se procedurat e shoqërimit për ta kanë paraqitur disa probleme për të cilat do të kryhet një hetim i thelluar.
Në Komisariatin nr.3, ishin shoqëruar 13 të mitur të cilët ishin lënë më pas të lirë, pas kryerjes së procedurave. Në Komisariatin nr.1 situata paraqitej më komplekse për shkak të numrit masiv të të shoqëruarve që ishin sjellë këtu.
Në këtë Komisariat ishin shoqëruar fillimisht rreth 50 persona, nga të cilët 24 të rritur dhe 25 të mitur, këta të fundit, pa raport shërbimi. Të miturve u ishin marrë gjeneralitetet dhe ishte komunikuar me prindërit. Gjatë momentit të inspektimit në dhomat e shoqërimit dhe ndalimit në Komisariatin nr.1 ishin 16 persona, nga 6 persona që ishte kapaciteti.
Në Komisariatin e Policisë Nr.2, janë shoqëruar 38 persona, 10 prej të cilëve nën moshën 18 vjeç. Në Drejtorinë Vendore të Policisë Tiranë, në datën 10.12.2020, janë shoqëruar 17 veta, 9 prej të cilëve nën moshën 18 vjeç. Këta të fundit janë lënë të lirë një orë pas shoqërimit.
Të gjithë të arrestuarit u intervistuan për veprimet e kryera në protestë. Disa prej tyre pretenduan se kanë marrë pjesë në protestë, por nuk kanë kryer veprime të dhunshme. Disa të tjerë pretenduan se kanë qenë kalimtarë të rastit dhe nuk kanë marrë pjesë në protestë. Dy të miturit, të pyetur nëse kanë qenë të pranishëm avokati apo psikologu gjatë marrjes në pyetje, u përgjigjen se janë pyetur vetëm nga punonjësi i Policisë i cili i ka bërë presion të pranonte se kishin kryer veprime të dhunshme.
Ata pretenduan se avokati ka ardhur në një moment të dytë dhe ka firmosur dokumentet që mbanin me vete (procesverbal të arrestimit, procesverbal të kontrollit personal dhe letrën e të drejtave të të miturit nën hetim).
