Protesta e djeshme në kryqytet shkaktoi shkatërrime, kaos e dhunë. Video të ndryshme ku efektivët dhunojnë qytetarët kanë qarkulluar në rrjet duke i revoltuar ata edhe më shumë.
Së fundmi të tjera pamje po qarkullojnë në rrjet, ku shihet se gjatë protestës efektivët e policisë, forcat ‘Shqiponja’ nuk ishin të vetmit, pasi në ‘lojë’ u futën dhe civilët.
Këta të fundit në një video që po qarkullon në rrjet shihen që tërheqin zvarrë disa të rinj dhe i dërgojnë në ambinetet e Ministrisë së Brendshme.
Mister ka mbetur se çfarë është bërë më pas me të rinjtë, nëse janë dërguar në komisariat apo janë lënë të lirë pak kohë më pas.
https://youtu.be/VOQ1mQKzOqk
Protesta nisi në orën 18:00, kur qytetarët u mblodhën sërish përpara Ministrisë së Brendshme, për të kërkuar drejtësi pas vrasjes së 25-vjeçarit Klodian Rasha, nga efektivi i Shqiponjave Nevaldo Hajdaraj. U deshën 10 minuta nga nisja e protestës që qytetarët të gjuanin me gurë dhe sende të forta drejt policëve, të cilët ndryshe nga dje sot u treguan vetvetja.
Ata hodhën gaz lotsjellës dhe me ujë nga autobotet u përpoqën të shpërndanin turmën, teksa erdhën edhe arrestimet e para. Në 19:15 shpërndahet pjesa më e madhe e protestuesve, por policia ishte në gatishmëri për grumbullime të tjera.
View this post on Instagram
Më pas, qytetarët u nisën drejt zonës së ish-Bllokut, ku dogjën koshat e mbeturinave dhe i vendosën në mes të rrugës. Në 19:40 pati sërish përplasje mes protestuesve dhe policisë. Qytetarët u drejtuan për te Drejtoria e Policisë.
Protestuesit bllokuan “Rrugën e Durrësit” me kangjella teksa vijuan shkatërrimet deri tek Zogu i Zi.
Ndryshe nga mbrëmja e djeshme, sot protesta mbaroi para orës policore, 22:00.
Rama largon vetëm Lleshajn, po të tjerët?
Krahas protestës Rama ishte në një komunikim të drejtpërdrejtë në orën 18:00, kur komunikoi dorëheqjen e ministrit Sandër Lleshaj. Kjo gjë shkaktoi entuziazëm tek protestuesit, që më pas duket se e harruan dorëheqjen e ministrit dhe filluan sërish të sulmojnë policët e FNSH-së.
Mirëpo, a mjafton vetëm dorëheqja e Sandër Lleshajt? Pamjet nga protesta e sotme treguan që jo. Videoja ku katër efektivë të FNSH-së gjakosën një të ri në mes të sheshit, tregoi se në polici nuk ka ndryshuar asgjë, por një ministër ka ikur dhe një tjetër ministër do të vijë.
View this post on Instagram
Kreu i qeverisë hoqi përgjegjësinë nga struktura e Policisë së Shtetit dhe e drejtoi atë vetëm te një individ, por në fakt qytetarët e dinë se kjo strukturë është e kalbëzuar, që nga hyrja në këtë strukturë, shmangia e përgjegjësisë, mostrajtimi i duhur në Akademinë e Policisë, etj.
E gjithë struktura nga Drejtoria e Policisë, te Shërbimi i Çështjeve të Brendshme dhe Ankesave deri tek Forcat Shqiponja, të gjithë drejtuesit duhet të largohen. Konkretisht, “iconstyle.al”, duke iu bashkuar nismës së protestuesve dhe kërkesës së tyre, kërkon largimin e :
-Muhamet Rrumbullaku, drejtor i SHÇBA, që manipuloi hetimin.
-Ardi Veliu, drejtori i Policisë së Shtetit.
-Gjovalin Loka, drejtori i Departamentit për Sigurinë Publike, mban përgjegjësi për dhunën ndaj protestuesve.
-Rebani Jaupaj, drejtor i Policisë Tiranë duhet të mbajë përgjegjësi pse policia ishte pa kamera në trup natën e ekzekutimit të Klodianit.
Sot sërish protestë!
Ditën e sotme do të zhvillohet sërish protestë për vrasjen e Klodian Rashës nga efektivi i policisë, mëngjesin e së hënës.
Në një hyrje live në emisionin “Opinion” një nga protestuesit ka thënë se protesta do të nisë në orën 16:00, duke shtuar se nga posti duhet të dorëhiqen edhe zyrtarë të tjerë.
