Pas 5 orësh protestë qytetarët e Tiranës janë mbledhur sërish para Kryeministrisë për tu drejtuar drejt shtëpisë së Klodianit në Laprakë, ku i ndjeri është ekzekutuar.
Qyetetarët me çadra në duar kanë dalë në protestë pas orës 10, dhe kjo jo pa qëllim, pasi aktivisti Genc Sejko u shpreh se ky marshim po bëhet për të sfiduar orën policore, duke qenë se edhe Klodiani u ekzekutua për shkak se kishte thyer rregullin është vendosur nga Komiteti i Ekspertëve.
“Kemi menduar sfidimin e orës 10, dhe kjo është arsyeja se pse i riu i vra. Do të jetë në heshtje, do të marshojmë nga këtu deri tek vendi ku është vrarë. Ky qiri simbolizon jetën e humbur. Nuk duhet që fakti që është vënë një orar të çoj në vdekjen e një të riu. Jeta e një të riu jeta e kujtdo duhet të ketë më shumë vlerë.”– tha Sejko.
25-vjeçari Klodian Rasha u vra nga një efektiv policie në zonën e Laprakës, në rrugën “Dritan Hoxha” rreth orës 1:45 të mëngjesit, ndërsa efektivi Nevaldo Hadëraj është prangosur 12 orë më pas. Polici ishte duke patrulluar në Laprakë, kur ka pikasur të riun i cili ishte duke lëvizur përtej afatit të lejuar nga autoritetet dhe i ka kërkuar të ndalojë. I riu nuk ka pranuar dhe polici e ka ndjekur të riun, e ka qëlluar duke e plagosur me dy plumba, një në kokë dhe një në shpatull.
Klodian Rasha ka ndërruar jetë në spital ndërsa familja mohoi ekzistencën e një arme në dorën e tij. Sipas të dhënave paraprake të ekspertizës, njëri prej plumbave e ka prekur 25-vjeçarin në pjesë e mbrapme të shpatullës dhe kjo i ka dëmtuar organet jetike.
