Prej orës 16:15 vijon protesta e qytetarëve, fillimisht para ministrisë së Brendshme duke kërkuar dorëheqjen e Sandër Lleshajt, më pas përpara Kryeministrisë, hyrjen e së cilës e shkatërruan me gurë dhe sende të tjera të forta.
Tashmë ata janë zhvendosur sërish pranë Ministrisë së Brendshme dhe në sheshin Skënderbej, ku kanë djegur pemën e Krishtlindjeve, pasi dogjën atë para Kryeministrisë.
Po ashtu, të rinjtë i kanë vënë flakën perdes së njërës prej dritareve në Ministrinë e Brendshme, të cilës i thyen dhe xhamin.
Ata arrijën të futen brenda, ndërkohë që janë përballur dhe me forcat e Policisë. Efektivët kanë hedhur gaz lotsjellës dhe kanë arritur që të largojnë të rinjtë prej aty.
Por cili është plani i protestuesve? Sipas “Abc News” nuk përjashtohet mundësia që në fund të tubimit të zhvillojnë një marshim drejt shtëpisë së Klodian Rashës. Protestuesit kanë deklaruar se do të vijojnë me vendosmëri qëndresën deri në vendosjen e drejtësisë dhe largimin e Sandër Lleshajt.
Ndërkohë, ka shkuar në 15 numri i policëve që kanë mbetur të plagosur në protestë. Mësohet se ata janë lënduar për shkka të sendeve të forta që kanë hedhur protestuesit.
Po ashtu protesta kanë nisur edhe në Durrës, Shkodër dhe Gjirokastër.
