Shtetet e Bashkuara të Amerikës kanë miratuar vaksinën e Pfizer dhe BioNTech. “Vaksina e koronavirusit e zhvilluar nga Pfizer dhe BioNTech siguron mbrojtje të fortë kundër Covid-19 brenda 10 ditëve nga doza e parë.” thuhej në dokumentet e publikuara të martën nga Administrata e Ushqimit dhe Barnave të SHBA (FDA), përpara takimit të grupit këshillues të vaksinave.
Muajin e kaluar, Pfizer dhe BioNTech njoftuan se vaksina e tyre me dy doza ishte 95% efektive. Dy dozat merren në një periudhë prej tre javësh.
Ndërkohë, Britania e Madhe ka filluar fushatën e vaksinimit, duke u bërë vendi i parë në botë që ndërmerr një hap të tillë.
Një grua 90-vjeçare nga Irlanda e Veriut është personi i parë në botë që i është dhënë vaksina Pfizer / BioNTech kundër Covid. Margaret Keenan, e cila do të mbushë 91 vjeç për disa ditë hyri në histori ditën e djeshme, por për sa kohë ajo dhe gjithë të tjerët që së shpejti do të vaksinohen kundër Covid-19 që të arrijnë sigurinë totale?
“Mbrojtje e fortë tashmë pas dozës së parë!”
Prodhuesi i vaksinës deklaroi se ajo do shpërndahet në dy doza me tre javë diferencë dhe efektiviteti i vaksinimit arrihet 7 ditë pas dozës së dytë. Ugur Sahin, CEO dhe bashkëthemelues i BioNTech, gjithashtu tha se studimi i kryer tregon se një shkallë e lartë e mbrojtjes kundër Covid-19 mund të arrihet shumë shpejt pas dozës së parë.
Një dokument i botuar nga Administrata Amerikane e Ushqimit dhe Barnave, sipas New York Times, flet për një përgjigje të fortë imune në 10 ditët e para pas marrjes së dozës së parë. FDA lëshoi sot (të martën në mëngjes) një analizë të detajuar të vaksinës Pfizer / BioNTech. Analiza e agjencisë në thelb konfirmon të dhënat nga studimet e prodhuesit, duke theksuar se “nuk janë identifikuar probleme specifike të sigurisë” dhe konfirmon një “mbrojtje të fortë” edhe pas dozës së parë. Vaksina është gjykuar e sigurt dhe efektive, dy cilësi që mendohet se do çojnë në miratimin zyrtar ditën e enjte.
Mbrojtje dy javë pas dozës së dytë!
Për sigurinë totale, megjithatë, njerëzit e vaksinuar do të bënin mirë të mbronin veten deri në një ose dy javë pas dozës së dytë, pastaj rreth një muaj pas injeksionit të parë.
Përgjigja imune kërkon kohë për tu fituar- shpjegon Sergio Abrignani, imunolog në “Universitetin Shtetëror të Milanos dhe Institutin e Gjenetikës Molekulare”. Zakonisht duhen dy javë pas injeksionit të dytë për të pasur një nivel të mirë mbrojtjeje.
Meqenëse është garuar me kohën për të arritur në vaksinë, disa detaje përfundimtare do të vijnë pas studimeve të mëtejshme. Tani për tani supozohet se mbrojtja fillon disa javë pas dozës së dytë.
Viursi në formë të zbutur edhe për pesë përqindëshin joefektiv!
Efektiviteti i vaksinës arrin deri në 95%, një shifër e lartë, nëse marrim parasysh se ajo e gripit arrin 40-60%. Po 5% tjetër? “Në të gjitha vaksinimet 100 për qind nuk ekziston dhe dikush nuk do të mbrohet – sqaron Abrignani. Megjithatë, ata që janë të vaksinuar, nëse sëmuren me Covid-19, do e kalonin në një mënyrë të zbutur.
Pfizer tha se ata 7-8 pacientë që u infektuan në studimet e efikasitetit të Fazës 3 nuk e kaluan në formë të rëndë virusin. Kjo konfirmon atë që është gjithashtu e vërtetë për gripin: njerëzit që sëmuren sërish nuk hasin në ndërlikime të gjendjes shëndetësore.
Furnizimi i Europës me dozat e nevojshme!
Evropa tashmë ka siguruar sasitë e saj të vaksinës falë një kontrate të nënshkruar në 10 nëntor me Pfizer dhe BioNTech, e katërta pas atyre të nënshkruara me AstraZeneca, Sanofi-Gsk dhe Johnson & Johnson.
Marrëveshja – e njoftuar nga Ursula von der Leyen, presidente e Komisionit Evropian – përbëhet nga dy pjesë: e para për furnizimin e 200 milion dozave, të cilave mund t’u shtohet një mundësi për 100 milion të tjerë, të caktuar me kriteret që do të vendosen.
Edhe Shqipëria është në grupin e vendeve që ka firmosur me COVAX, një nismë ndërkombëtare që synon të bashkojë burimet midis kombeve të pasura dhe të varfra, për të siguruar një qasje më të barabartë të vaksinave në të gjithë botën, por shpërndarja reale e vaksinave do të lërë pas vendet me të ardhura të ulëta dhe të mesme, ku bën pjesë vendi ynë.
