Portieri i kombëtares shqiptare, Etrit Berisha, është shtruar në spital pas infektimit me Covid-19. Mediat italiane kanë bërë të ditur se Berisha është konfirmuar pozitiv që në datë 27 nëntor dhe sot është detyruar të shtrohet në spitalin rajonal të Ferrara-s.
Thuhet se orët e fundit Etriti është pranuar në departamentin e specializuar Covid-19 të spitalit Cona për të kryer teste klinike. Nuk dihet gjendja e saktë shëndetësore e portierit të kombëtares, por mesa duket ai është rënduar, sepse më parë ka qenë i karantinuar në shtëpi.
Lajmin e infektimit të Berishës e bëri të ditur klubi i SPAL, i cili është kujdesuar të saktësojë se gardiani është infektuar teksa ishte pjesë e Kombëtares shqiptare. Etrit Berisha nuk është i vetmi që është prekur nga Covid-19 në kombëtaren shqiptare. Elseid Hysaj po ashtu është infektuar më herët, gjithashtu edhe Thomas Strakosha, Marash Kumbulla dhe Myrto Uzuni.
