Agjencia Europiane e Barnave ka refuzuar kërkesën e kompanisë gjermane farmaceutike Biontech dhe partnerit amerikan Pfizer për miratimin e përdorimit urgjent të vaksinës anti-COVID.
Sipas kësaj Agjencie, mendimi i saj për vaksinën e PFIZER do të jepet në 29 dhjetor dhe më pas mendimi do t’i përcillet vendeve anëtare për aprovim.
Ndërkohë është shtyrë edhe aprovimi i vaksinës së kompanisë MODERNA deri më 21 janar të vitit 2021. Ministri gjerman i Shëndetësisë Jens Spahn kishte njoftuar për vaksinim të popullsisë para vitit 2021, por tashmë ai tha se duhet të presim deri në fillim të vitit të ardhshëm.
Kryetarja e Federatës së Mjekëve të Europës, Aurora Dollenberg në një intervistë televizive deklaronte se do të përdoret vaksina e prodhuar nga kompania BioNTECH, Pfizer.
Ajo tha se vaksinimi do të bëhet në kategori, pra nga personat më të ekspozuar siç janë mjekët e deri tek njerëzit e tjerë. Dollenberg shprehet se vaksina do të jetë falas dhe jo e detyrueshme dhe do të fillojë nga janari i vitit 2021.
“Ne kemi marrë një lajmërim zyrtar këtu që vaksinimet e para po bëhen në qendrat universitare dhe në radhë të parë tek stafet mjekësore. Nga janari dhe sipër do bëhet ky vaksinim me kategori. Për Gjermaninë do të jetë 100 përqind falas dhe nuk do të jetë e detyrueshme” – deklaronte para këtij lajmi mjekja Dollenberg.
