Drejtoresha e IShP-së, Albana Fico deklaron se ka një valë të gripit të stinës dhe për këtë qëllim po vaksinohen mësuesit dhe edukatoret.
Fico u shpreh se deri më tani ka pasur një interesim shumë të madh. Ajo thotë se kjo ka ardhur për shkak se qytetarët duan të mbrohen nga gripet stinore në mënyrë që të kufizojnë dhe infektimin nga koronavirusi.
“Vaksinimi ndaj gripit ka filluar me punonjësit shëndetësor. Ne kemi raportuar. Vaksinat që kanë ardhur i kemi ezauruar. E filluam nga punonjësit shëndetësor pasi ata janë në luftën kundër COVID. Ditën e sotme kanë filluar vaksinimi i mësuesve. Vaksinimin ndaj gripit ne e kemi më të lehtë për shkak të një eksperience disavjeçare. Këtë vit kemi pasur një interesim të madh të vaksinimit ndaj gripit kjo për shkak dhe të tejçimit të mesazhit tonë dhe përmes medias” – tha Fico.
Në një intervistë televizve ajo tha se nuk ka ende një vendim konkret por në bazë të shifrave të koronavirusit gjithçka mund të ndryshojë.
“Shifrat e demonstrojnë situatën e vështirë ku jemi. Këto janë masa të mirëmenduara. Të gjithë faktorët janë diskutuar duke u bazuar në faktorë të ndryshëm. Në të gjithë këtë situatë që po kalojmë. Me shpejtësi janë vendosur në funksion kapacitetet testuese dhe ato spitalore. Spitali COVID 4 është gati së bashku me personelin mjekësor. Një apel për qytetarët është që të mos ngurojnë të kërkojnë ndihmën e shërbimit mjekësor. Ka një moment për të qëndruar në shtëpi që e mbështet mjeku i familjes ndërsa ka dhe një moment që duhen shtruar në spital. Nuk do të ngurojmë që të marrim masa të tjera për të kufizuar transmetimin e këtij virusi. Pandemia nuk varet vetëm nga numri i të infektuarve” – deklaroi Fico.
