Pavarësisht se kanë kaluar plot 8 muaj nga pandemia dhe çdo ditë po shënohen rekorde të frikshme ka ende nga ata që nuk besojnë në ekzistencën e tij. Madje mosbesimi në fillim të pandemisë ishte shumë më i madh e kishte nga ata që thoshin se e gjitha ishte e stisur nga politika për të izoluar njerëzit. Shumë nuk preferuan të ndiqnin disa masa të thjeshta dhe sot pasojat po i vuajmë të gjithë bashkë duke parë rritje të shifrave të të infektuarve e viktimave.
Për të gjithë kategorinë e mosbesuesve të virusit, ka reaguar e revoltuar edhe mjekja kirurge Lida Shosha. Ajo shprehet se kur paralajmëroi se Covid-19 është shumë i rrezikshëm e se duhet treguar kujdes, askush nuk e besoi, e madje e shanë, e tallën dhe e mallkuan. Shosha thotë se sot virusi është i pranishëm në çdo familje shqiptare dhe se po u troket të parëve në derë rebelëve që kundërshtojnë masat mbrojtëse.
Mjekja shprehet se na pret një dimër i madh përpara dhe ju ka bërë sërish thirrje qytetarëve që të tregojnë shumë kujdes.
Postimi i mjekes Shosha
Na pret ‘Dimri i madh’
Kur muaj më parë bëra një status sensibilizues për mosbesuesit, tallësit, njerëzit që për hir të vërtetës ishin të shumtë, që akuzonin, talleshin, etiketonin, njollosnin e mallkonin mjekët se po shpifnin për ekzistencën e virusit, shumë syresh mu vërsulën e nuk kursyen lumenjtë e mallkimeve.
Po sot, ku jeni, dilni e gëlltisni çfarë vollët nga krevatet e kolltukët e shtëpive, studiot televizive, kafenetë me nargjile. Fatkeqësisht covidi i mallkuar po troket në çdo derë diku si mik e diku si armik, po merr njerëzit e shtrenjtë, udhëtimi i tij në këtë botë akoma vazhdon, s’dihet kush do mbijetojë.
Virusi është aq i zgjuar saqë viziton të parët ata që injoruan ca masa mbrojtëse minimale, që s’u kushtonte asgjë. Si mjek do jap përherë kontributin tim në sensibilizimin e popullatës, për ruajtjen e shëndetit. Bëni kujdes miq. Kurba e infektimeve dhe vdekjeve po rritet nga dita në ditë… ‘Dimri i madh po afron.’ Zoti na mbroftë të gjithëve
