Holanda na vendos në vendin kryesor evropian për kultivimin dhe kontrabandës së kanabisit. Kjo tregon një dështim të madh të ministrit të Brendshëm, Sandër Lleshaj për të çrrënjosur fenomenin e kultivimit të drogës. Kujtojmë se ai erdhi në këtë detyrë pas Saimir Tahirit dhe Fatmir Xhafajt me misionin për të rregulluar imazhin e policisë që e kishte kanabizuar vendin.
Më 31 gusht 2020, kanali i njohur holandez “Vice TV”, e vendoste Shqipërisë në hartën e trafikut botëror të drogës, një ndër linjat që kalon nga vendi ynë dhe përfundon në Holandë.
Ministri Lleshaj nuk reagoi, megjithëse i qëndron varur një premtim i pambajtur për të hequr Shqipërinë nga harta e vendeve që kultivojnë dhe trafikojnë kanabisin.
Prokuroria ia hedh përgjegjësinë Policisë
Kryeprokurori Olsian Çela, gjatë raportimit në Komisionin e Ligjeve më 11 maj 2020 shprehu shqetësimin për rritje të kultivimit të kanabisit e teksa përmendi dhe qarqet më problematike nënvizoi se Policia e Shtetit nuk ka dokumentuar shkaqet e kësaj tendence.
“Kemi vënë re një rritje të kultivimit të kanabisit në qarqet Krujë, Vlorë, Gjirokastër, ndoshta Shkodra ku problemet janë konstante. Pse ka ndodhur kjo rritje e fenomenit? Në fakt do bëj një analizë paraprake jo vetëm brenda strukturës së Prokurorisë, por edhe Policisë së Shtetit, për të kuptuar cilat kanë qenë masat parandaluese nga ana e tyre në këto qarqe” – u shpreh Çela.
Policia pranon rritjen e kultivimit të kanabisit
Drejtori i Përgjithshëm i Policisë së Shtetit, Ardi Veliu më 29 maj, pranoi se tendenca për kultivimin e kanabisit ishte në rritje.
“Po është e vërtetë, tendenca është në rritje edhe këtë vit, tendenca për kanabisin është në rritje, por shifrat e policisë për goditjen janë në rritje. Pushteti vendor dhe prefektët duhet të marrin më shumë përgjegjësi sepse në këtë luftë ka ngelur vetëm policia. Të gjithë aktorët e tjerë të marrin përgjegjësi. Trafikantët kanë ndryshuar strategji, mbjellin në pyje të larta malore dhe mes pyjesh dhe në toka pa pronar” – deklaroi Veliu.
Dështimi i strategjisë, kush do të përgjigjet?
Ministri i Brendshëm Lleshaj është përgjegjës kryesor për dështimin e “Planit Kombëtar Kundër Kultivimit të Kanabisit” i cili pati për qëllim reduktimin deri në shmangien totale të kultivimit të lëndës narkotike në vend.
Tre vite nga nisja e “Planit Kombëtar Kundër Kultivimit të Kanabisit”, shifrat e raportuara nga Policia e Shtetit tradhtojnë nismën. Ministri i Brendshëm, Sandër Lleshaj, gjatë interpelancës në Kuvend më 15 tetor, mohoi që kanabisi të ishte më fenomen në vend teksa argumentoi se ai kultivohej në mënyrë sporadike.
“Viti 2020 shënoi një tjetër vit të përshkallëzimit të suksesshëm të luftës kundër kultivimit dhe trafikimit të kanabisit në vendin tonë. Fenomeni i kanabisit në Shqipëri ka marrë goditje shkatërrimtare, tashmë në vend nuk mund të flitet më për një fenomen, por vetëm për tentativa të izoluara për kultivim apo trafikim” – u shpreh Lleshaj.
Policia e implikuar në kultivimin e drogës
Plani Kombëtar Kundër Kultivimit të Kanabisit përmbyllet në fund të këtij viti. Por Policia e Shtetit, po raporton një hartë të dhe të kultivimit të kanabisit gjatë vitit 2020.
Këtu ka një përgjegjësi të madhe Shërbimi SHÇBA i drejtuar nga njeriu i afërt i Lleshajt, Muhamet Rrumbullaku.
Policët janë të përfshirë në shumë raste korrupsioni, abuzim me detyrën dhe përfshirje në kultivimin e kanabisit. SHÇBA i mori sinjalet për implikimin e policisë qysh në vitin 2019, por veprimi i saj ishte i dobët.
Sipas Shërbimit për Çështjet e Brendshme dhe Ankesave, oficerët e policisë janë shpesh të përfshirë edhe në kultivim kanabisi. Për vitin 219 janë zhvilluar 4 operacione, ku oficerë policie kishin lejuar kultivimin e rreth 20.000 bimëve kanabisi. Strukturat e hetimit kanë zhvilluar vetëm 4 operacione për goditjen e kultivimit të bimëve narkotike, ku janë goditur subjekte policore të dyshuar për shpërdorim detyre, qëndrime korruptive apo favorizim në kultivimin e bimëve narkotike.
Implikimi i policisë është konstatuar në Gorë, Bashkia Maliq, në Sopot – Zavalinë, Elbasan, në Orenjë, Librazhd, në Selitë, Mallakastër, në Qendër dhe Gjerbes, Skrapar.
Kundrejt këtij alarmi, SHÇBA ka fjetur gjumë, sepse në periudhën janar-gusht 2020 tregohet se vendi është kanabizuar.
Harta e kanabisit përfshin gjithë qarqet
Të dhënat zyrtare nga Policia e Shtetit, për periudhën janar-gusht 2020 tregojnë se janë asgjësuar më shumë se 104,500 rrënjë drogë, janë kapur më shumë se 5,5 ton kanabis i gatshëm për shitje si dhe janë shënuar 1,422 vepra penale në fushën e drogave. Neglizhenca ka bërë që harta e kultivimit të drogës të mbulojë të gjithë vendin nga veriu në jug.
Shifrat e 8 muajve të parë të vitit 2020 janë më të larta se viti 2019 i marrë në tërësi, gjatë së cilit u asgjësuan 90,175 bimë narkotike apo thënë ndryshe, sa totali i viteve 2017 dhe 2018 të marrë së bashku, gjatë së cilëve u asgjësuan 103 mijë bimë kanabisi.
Pasojat
Mediat holandeze, duke analizuar pasojat e të qenit narko-shtet, nënvizojnë se rritja e prodhimit të drogës në vend shton vrasjet, kërcënimet e avokatëve dhe gjyqtarëve, të medias,
Fenomeni krijon një zinxhir ngjarjesh që thjesht i përkeqësojnë gjërat, duke lënë pas gjurmë të vdekjes, sëmundjes, dhunës, skllavërisë, varësisë, krimit dhe pabarazisë. Të gjithë humbin – përveç trafikantëve dhe të zyrtarëve të korruptuar.
