SHBA jep shpresë për riatdhesimin e fëmijëve shqiptarë dhe nënave të tyre në kampet siriane Hol dhe Roj. Shtetet e Bashkuara janë të gatshme të riatdhesojnë shtetasit e huaj që mbahen nga forcat Kurde në kampe dhe burgje në Sirinë verilindore, tha të martën një zyrtar i lartë i Departamentit të Shtetit.
Nathan Sales, koordinator për antiterrorizëm brenda Departamentit të Shtetit, tha që riatdhesimi i mijëra militantëve të dyshuar të Shtetit Islamik (IS) dhe familjeve të tyre në vendet e tyre të origjinës ishte e vetmja mënyrë për t’i dhënë fund kësaj situate.
Ai tha se SHBA janë duke dhënë shembullin dhe tashmë kanë ndihmuar disa vende për të riatdhesuar qytetarët e tyre nga rajoni. Ai vazhdoi të kritikojë vendet perëndimore, të cilat kryesisht kanë refuzuar thirrjet për të riatdhesuar shtetasit e tyre.
“Sinqerisht ne duhet të shohim më shumë vende të bëjnë riatdhesimin dhe kjo përfshin disa nga aleatët më të afërt tradicionalë të SHBA”, tha Nathan Sales, nga Departamenti i Shtetit i SHBA duke folur në Forumin Global të Sigurisë, një ngjarje e organizuar nga think-tank i sigurisë Soufan Center.
“Shtetet e Bashkuara kanë ndihmuar një numër vendesh në botë me riatdhesimin e shtetasve të tyre dhe kjo është një ofertë e përhershme. Ne jemi të gatshëm të ndihmojmë çdo vend që dëshiron të ecë përpara në këtë proces. Na telefononi dhe ne do të gjejmë një mënyrë për ta bërë atë të funksionojë”
Sales tha se ai nuk mund të tregonte se cilat vende kishte ndihmuar SHBA për arsye operacionale, por veçoi dhe lavdëroi Italinë. Në shtator, Italia riatdhesoi një grua dhe katër fëmijët e saj të cilët ishin mbajtur në kampin al-Hol në Siri. Gruaja u arrestua më pas dhe u akuzua.
Sales tha: “Ne i lavdërojmë aleatët tanë italianë që kryesojnë në këtë drejtim në Evropë.”
Vërejtjet e Sales sugjerojnë që në SHBA po rritet padurimi ndaj dështimit në për riatdhesime nga vendet e tjera duke përfshirë Mbretërinë e Bashkuar, Kanadanë, Gjermaninë, Francën, Belgjikën dhe Australinë për të marrë përgjegjësinë për qytetarët e tyre.
Komentet e tij vijnë pasi ushtaraku më i lartë i SH.B.A.-së në Lindjen e Mesme tha në gusht se ushtria amerikane ishte e gatshme të riatdhesonte të arrestuarit kudo në botë.
“Unë jam i lumtur të siguroj burimet për t’i zhvendosur kur jemi të udhëzuar ta bëjmë atë, dhe unë mund t’i zhvendos ato kudo në botë shumë shpejt dhe në një mënyrë të sigurt dhe transparente,” tha shefi i Komandës Qendrore të SH.B.A., gjenerali Kenneth F McKenzie.
Më shumë se 65,000 njerëz janë duke u mbajtur në kampin kryesor al-Hol dhe kampin më të vogël al-Roj, të cilat administrohen nga Administrata Autonome Kurde e Sirisë Verilindore, e njohur gjithashtu si Rojava.
Rreth 3,000 gra dhe 7,000 fëmijë në kampe janë shtetas të huaj, ndërsa rreth 2,000 burra të huaj janë të arrestuar në burgje midis luftëtarëve të dyshuar të IS, sipas zyrtarëve kurdë.
Apeli i shoqatave
Muajin e kaluar, grupet e mbështetjes së familjeve që kanë të afërmit në këto kampe, në disa vende njoftuan krijimin e një rrjeti, “Familjet për Riatdhesimin Ndërkombëtar”, për të bërë presion mbi qeveritë për të marrë masa.
“Refuzimi për të riatdhesuar qytetarët e tyre nuk mund të jetë zgjidhja për çdo qeveri që krenohet me mbrojtjen e të drejtave të njeriut,” tha rrjeti në një deklaratë.
Ndërkaq, familjet franceze të fëmijëve të ndaluar në kampet e Sirinë Verilindore nxisin Parlamentin Evropian që të riatdhesojë të gjithë fëmijët evropianë.
Thirrja është lëshuar nga Organizata “Collectif des Familles Unies”. Shoqata kujton se u mbush një vit, nga data 26 nëntor 2019, kur Parlamenti Evropian miratoi rezolutën për riatdhesimin e fëmijëve nga kampet siriane.
Strasburgu shprehte shqetësimin e thellë për perspektivën e zymtë të dhe situatën në të cilën gjenden këta fëmijë. Sipas rezolutës janë 600 fëmijë evropian që gjenden me nënat e tyre ose pa prindër në kampet al Hol dhe Roj, të privuar nga të gjitha të drejtat e Konventës Ndërkombëtare të mbrojtjes së Fëmijëve.
Aktualisht fëmijët janë në një territor të rrezikuar nga luftimet, nga epidemia, por edhe në mungesë të kushteve minimale të jetesës. Gazeta Reforma publikon një video të marrë këto ditë në kampin Roy, ku tregohen kushtet e vështira të jetesës tani që nis dimri.
“Fëmijët janë të pafajshëm dhe duhet të trajtohen si viktima”, bën thirrje shoqata.
Një dimër tjetër po vjen në Siri për këtë famijë. Dimori është i ashpër dhe temperaturat shkojnë në minus 10 gradë Celcius. Ne duhet t’i riatdhesojmë këta fëmijë pa e shtyrë më shumë këtë veprim.
Shqipëria riatdhesoi 4 fëmijët dhe një grua nga kampi famëkeq i Sirisë, Al Hol, pas një operacioni të kryer nën koordinimin e disa institucioneve më 27 tetor 2020. Fëmijët Amar Rasha, Emel Rasha e Hatixhe Rasha dhe nëna e tyre Floresha Rasha, si dhe djali i familjes Dumani, Endri Dumani mbërritën në aeroportin ndërkombëtar të Rinasit, të shoqëruar nga kryeministri Edi Rama. Në Siri gjenden mbi 50 fëmijë shqiptarë dhe nënat e tyre. Qeveria ka premtuar të riatdhesojë edhe të tjerët, por nuk ka përcaktuar afat. Deklarata e fundit e SHBA është një rrugëzgjidhje e re, prandaj qeveria duhet të veprojë me shpejtësi.
Winter arrived to #Alhol camp in #Syria and it is not pleasant (rain and wind). Many tents are leaking. pic.twitter.com/BBxcNgwrVm
— Vera Mironova (@vera_mironov) November 7, 2020
