Kinematografia shqiptare ka humbur një tjetër personalitet të shquar, pasi regjisori i mirënjohur Muharrem Fejzo është ndarë nga jeta në moshën 87-vjeçare.
Pas një beteje të gjatë me Covid, Fejzo ka mbyllur sytë përgjithmonë, ndërsa këtë lajm të hidhur e ka dhënë djali i tij, Joe.
Ai ndau në rrjete sociale foton e fundit me të atin nga spitali, duke i kërkuar falje që s’mundi t’i qëndronte pranë qoftë edhe për t’i dhënë një gotë ujë.
“Lamtumire Babbo …
Pusho ne Paqe ne krahet e te Madhit Zot e gjithe te Dashurve atje siper .. me Fal qe nuk te perkedhela dot e s’te dhash dot nje gote uje .. Nuk e meritoje nje ikje te tille .. Artisti yne .. Miku,.. Babai i pergjeruar .. Bashkshorti i jetes ..“- ka shkruar ai.
Muharrem Fejzo lindi në Kolonjë në vitin 1933. Fejzo bëri praktikë si sufler në Teatrin Popullor në Tiranë. Ai gjithashtu kreu studimet në degën e aktrimit dhe nga pasioni i madh që kishte për kinemanë, Muharrem Fejzo kontribuoi si grimier në disa nga filmat e parë shqiptarë. Vite më vonë u bë drejtori i Shtëpisë së Kulturës në qytetin e Kukësit.
Përpara se të realizonte filmin e tij të parë, “Montatorja” (1970), Fejzo punoi si asistent regjisor në dy filma artistikë, “Prita” (1968) të Mithat Fagut dhe “Njësiti Guerril” (1969) të Hysen Hakanit. Në vitin 1972 Muharrem Fejzo, së bashku me regjisorin Fehmi Hoshafi, realizoi filmin “Kapedani”, komedinë e parë që vazhdon të konsiderohet edhe sot si një nga kryeveprat e kinemasë shqiptare.
Gjatë karrierës së tij, regjisori Muharrem Fejzo realizoi mbi dhjetëra filma të tjerë, midis të cilëve mund të përmenden: Operacioni “zjarri” (1973) dhe “Mësonjtorja” (1979). Filmin e tij të fundit “Muri i gjallë”, Muharrem Fejzo e realizoi në vitin 1989.
Fejzo mbante titullin “Naim Frashëri” dhe “Mjeshtër i Madh”.
