Ish presidenti i Kosovës Hashim Thaçi ka dalë para trupës gjykuese në Hagë, ndërsa mbi të rëndojnë 6 akuza. Ai akuzohet për krime të luftës bashkë me Kadri Veselin, Rexhep Selimin dhe Jakup Krasniqin.
I pyetur nëse është njohur me aktakuzat, Thaçi tha se i hedh poshtë të gjitha. “I dëgjova, i kam lexuar dhe i hedh poshtë të gjitha”, deklaroi ai.
Ndërkohë, avokati i tij mbrojtës, David Hooper, tha se kjo gjykatë është themeluar për çështjet e Kosovës, por nuk sheh asnjë simbol të Kosovës aty. Në fjalën e tij, avokati mbrojtës u shpreh se do të kërkojë lirimin e përkohshëm nga paraburgimi i Hagës për ish-presidentin Thaçi.
“Kjo është një gjykatë e Kosovës, por këtu nuk ka asgjë të Kosovës, asnjë simbol të Kosovës. Unë s’jam anëtar i Odës së Avokatëve të Kosovës, pra është e rëndësishme që të sillet kostumi jonë në gjykatë”, tha ai, ndërsa iu drejtua gjyqtarit Nicolas Guillou duke i thënë: “Ju të pajton të ishit veshur me të kuqe. U çuditëm kur ju bëtë arrestimin e Thaçit, ndërkohë që mund të kishe një fletëthirrje. Unë do të kërkoj lirimin e tij dhe besoj ua kam shprehur këtë mendim tim që të shtunën. Ne mendojmë se nuk është e përshtatshme të bëhet kjo kërkesë pa e ditur se çfarë kërkon prokuroria që është rreziku i arratisjes”, tha ai.
Ditën e sotme në Gjykatën Speciale në Hagë u zhvilluan sot dy seancat e para gjyqësore për zyrtarët e UÇK-së që akuzohen për krime lufte. I pari që u përball me togat e zeza është ish-kryeparlamentari Jakup Krasniqi, ndërsa seanca u zhvilluar edhe për ish-presidentin Hashim Thaçi.
Të dy u deklaruan të pafajshëm lidhur me akuzat e ngritura ndaj tyre për krime lufte. Ndërkohë që nesër para Gjykatës Speciale del ish-kryeparlamentari Kadri Veseli, ndërsa pasnesër Rexhep Selimi.
Thaçi ka dhënë dorëheqjen nga posti i Presidentit menjëherë pasi i është konfirmuar aktakuza dhe vendin e tij e ka zënë përkohësisht Vjosa Osmani.
