E teksa rastet e reja nga Covid-19 janë në rritje, duket se edhe vala e dytë e pandemisë ashtu si e para, e ka gjetur të papërgatitur sistemin shëndetësor.
Së fundmi, ‘Faxnews’ ka marrë dëshmitë e disa prej familjarëve të të infektuarve që ndodhen në spitalin Infektiv, duke bërë edhe dëshmi tronditëse.
“Kam shtruar mbrëmë mamin, dhe pa terezi ka qenë çështë e vërteta, uroj që të bëhet më e mira, fluksi është i madh çështë e vërteta”, shprehet një qytetare.
“Kam burrin të shtruar, sot në mëngjes e kanë shtruar”, tregon një qytetare tjetër.
Ndërkohë që një tjetër qytetare, shprehet se ka shtruar bashkëshortin në Infektiv, gjendja e të cilit ka qenë e rënduar për shkak se ka pasur dhe probleme të mëparshme me mushkërinë, dhe me zemrën. Ajo tregon kalvarin e vuajtjeve që ka kaluar pwr ta shtruar në spitalin Covid 2, ku nuk i kanë pranuar, dhe më pas kanë pritur për minuta të tëra në Infektiv, pasi vendet janë të mbushura.
“Mezor e kanë pranuar burrin, e çuan te Shefqet Ndroqi, prej andej na dëbuan se ne jemi nga zona e jugut. Jam e shqetësuar se burri është me gjysmë mushkërie, edhe unazë ka, e kam pasur me oksigjen në shtëpi, pritëm mbi gjysëm ore këtu, tani nuk e di fare ça është bërë me të. Dëgjojmë shumë muhabete, dhe thashethemnaja, por shpresoj që të bëhet mirë”, shprehet ajo.
Disa ditë më parë protokolli për kurimin e personave që janë pozitiv me Covid-19 ka ndryshuar sërish dhe tashmë parashikohet se ata që kurohen në shtëpi do të trajtohen me mjekun e familjes nëse kanë forma të lehta si pneumoni dhe saturime mbi 92%.
Në rastet kur pacienti është për në spital do e tregojë vetëm skaneri, i cili nuk duhet të bëhet që ditën e parë të shenjave, por në ditën e 5 ose të 6 të sëmundjes.
Antibiotiku do të jepet vetëm në rastet kur ka ulje të oksigjenit, apo vështirësi në frymëmarrje. Po ashtu për rastet, të cilat do të duhet të kryhen injeksione, janë mjekët e familjes dhe infermierët e qendrave shëndetësore të cilët do të asistojnë në banesë.
Mjekët e familjes kanë me dhjetëra raste në ditë persona pozitiv Covid dhe shumica prej tyre janë të rinjtë të cilët 90 % e tyre po e kalojnë në shtëpi.
