Harry Styles do t’i rikthehet sërish karantinës për 14 ditë. Mediat e huaja kanë mësuar se ish-pjesëtari i “One Direction” është detyruar të izolohet, sepse një person nga stafi i filmit të ri që po xhirohet ka rezultuar pozitiv me Covid-19.
Këto kohë Harry ka qenë në xhirimet e filmit “Don’t Worry, Darling”, në të cilin luajnë edhe Florence Pugh, Chris Pine, Gemma Chan, Kiki Layne dhe Nick Kroll. Kompania prodhuese ndali menjëherë xhirimet ditën e djeshme pasi një nga pjesëtarët e skuadrës u infektua me koronavirus.
Kompania në fjalë ka konfirmuar se punonjësi ka dalë pozitiv gjatë një testimi rutinë dhe se është izoluar menjëherë. Ata kanë shtuar se gjithë pjesa tjetër e skuadrës së filmit është futur në karantinë për 14 ditë, por asnjë tjetër nuk është prekur nga virusi deri më tani.
Harry Styles ju bashkua kastit të aktorëve në muajin shtator dhe në film ai ka rolin e bashkëshortit të Alice (Florence Pugh), që i fsheh një sekret të madh gruas së tij.
