Komiteti Teknik i Ekspertëve, vetëm disa ditë më parë, sugjeroi që Universitetet të mos e fillojnë vitin e ri akademik në auditore, por të fillojnë procesin mësimor online, për shkak të situatës nga pandemia Covid-19.
Sipas ekspertëve, Qytet Studenti, konviktet dhe auditoret universitare me studentë, janë vatra të reja të rrezikshme për shtimin e rasteve me Covid-19.
Por ky vendim, i njoftuar publikisht vetëm 3 ditë përpara nisjes së vitit të ri akademik, i ka revoltuar studentët, të cilët janë gjendur të papërgatitur.
Shumë studentë kishin ardhur nga rrethet dhe ishin shpërngulur në Tiranë, për tu përgatitur për vitin e ri akademik, duke paguar kështu edhe tarifat e qerave apo të konvikteve ku do të qëndronin.
Me këtë vendim të befasishëm, studentët dolën defiçit, pasi tashmë duke qenë se mësimi do të zhvillohet online, ata do të kthehen në vendlindjet e tyre.
Procesi mësimor online gjithashtu ka edhe riskun e kostos së internetit, pasi platformat online siZoom, GoogleClassroom, etj, kanë kostot e tyre në mësimin online nga shtëpitë.
Të gjendur në këtë qorrsokak, studentët kanë vendosur që të protestojnë ditën e nesërme në orën 10:00, përballë Ministrisë së Arsimit.
Por a do të jetë kjo protestë një shkëndijë si ajo e 4 dhjetorit 2018-të, ku pasi studentët e Fakultetit të Arkitekturës ngritën zërin kundër pagesës për provimet e mbartura, si dhe për përgjysmimin e tarifave vjetore, më pas protesta mori jehonë në të gjithë fakultetet dhe universitetet e tjera.
Gjasat nuk janë shumë të favorshme për përsëritjen e një skenari të tillë, pasi edhe konteksti ndryshon. Duke qenë se pandemia Covid-19 është ende në qarkullim, sipas ligjit të veçantë, policia nuk i lejon tubimet masive, për shkak të moskrijimit të vatrave të reja nga covid.
Po ashtu, marrja në dorë e protestës nga student militant të forumeve partiake dhe të infiltruar në Këshillat Studentorë, e zbeh prezencën e studentëve që duan të protestojnë për një kauzë të përbashkët dhe madhore, pasi politiziohet dhe e humb kuptimin.
Gjithsesi të shpresojmë që ditën e nesërme studentët të protestojnë për kërkesat e tyre të drejta dhe ministria e Arsimit t’i japë një përgjigje dhe një zgjidhje./GazetaReforma.com/
