Muzeu Historik Kombëtar është muzeu më i madh në Shqipëri dhe një nga më të rëndësishmit. Në mjediset e muzeut gjenden rreth 5000 objekte, të cilat i përkasin një periudhe relativisht të gjatë kohore duke filluar nga mijëvjeçari IV para Krishtit dhe deri në gjysmën e dytë të shekullit XX.
Por që nga periudha e inagurimit të tij, Muzeu Historik Kombëtar, sipas studiuesve ndodhet në gjendjen e tij më të keqe, për shkak të mungesës së vëmendjes nga ana e Ministrisë së Kulturës. Studiuesi Jaho Brahaj është shprehur për gazetën “SOT” se para disa vitesh është folur për një projekt rikonstruksioni, mirëpo asgjë nuk është bërë dhe pse një ndërhyrje është tepër e nevojshme duke marrë edhe mendimin e ekspertëve.
“Në mos gaboj para tre vitesh u mblodh dhe u krijua një komision për rikonstruksion të përmbajtjes së MHK. Një punë, që u fillua me bujë dhe u shkri. Problem i dytë është që aty nuk do të bëhet asnjë lloj ndërhyrje të paktën nga kjo qeveri që ne kemi sot, sepse ajo është jo në dilemën por në planet tinëzare që ka për të bërë godinë pas territorit të MHK. Është e kotë që të flasim që dikush nga ky shtet do të vërë dorë për MHK, qoftë nga jashtë për atë godinë apo dhe nga brenda. Me gjendjen me probleme që ka MHK është jashtë vëmendjes dhe kujdesit nga Ministria e Kulturës”, është shprehur Brahaj.
Ai ka shtuar se përveç kushteve të institucionet, problem mjaft i madh është edhe fakti që nuk ka mundësi për të blerë vepra për fondin e Muzeut.
Muzeu Historik Kombëtar shumë larg kushteve nga muzetë e Evropës
Muzeu Historik Kombëtar që duhej të ishte shembull për të gjithë muzetë e tjera në vendin tonë, është shumë larg institucioneve të ngjashme në Evropë. Sipas studiuesit aty jo vetëm që ka mungesë fondesh, por edhe kushtet janë në gjendje skandaloze.
“Muzeu jo vetëm që duhet të ketë fondin tij për blerje objektesh, ruajtje, studime dhe botime, por në mënyrë urgjente të paktën kushtet duhet ti ketë në mënyrë të shkëlqyer sipas parametrave që kanë muzeumet sot në Ballkan dhe në Europë. Por MHK sot jo vetëm që nuk ka kushte, por shumë herë është ngritur si problem që dhe sektori i ikonave është në një temperaturë të tmerrshme në verë”, ka thënë studiuesi për gazetën “SOT”.
Muzeu Historik ishte dhe një nga institucionet kulturore më të prekura për shkak të tërmetit të 26 nëntorit dhe për disa muaj ai mbylli dyert për vizitorët. Ende dhe sot një pjesë e ambienteve të tij të brendshme janë të dëmtuara dhe prandaj konsiderohet si një nga godinat që është lënë prej vitesh në mëshirë të fatit.
