Një pjesë e vendeve europiane i janë rikthyer masave të ashpra për shkak të shtimit të rasteve me Covid-19. Gjermania vendosi që nga 2 nëntori të mbyllen të gjitha aktivitetet e sektorit të argëtimit. . Teatrot, operat dhe sallat e koncerteve duhet të mbyllen deri në fund të muajit. Sipas dpa, kufizimet prekin gjithashtu edhe kohën e lirë dhe sportet amatore; sportet individuale pritet të përjashtohen. Sporti profesionist në nëntor duhet të zhvillohet pa spektatorë. Kjo vlen edhe për Bundesligën e futbollit.
Nga ana tjetër kryeministri francez njoftoi një bllokim të dytë kombëtar, duke ndaluar lëvizjen mes rajoneve si dhe duke vënë masa kufizuese. Sipas kufizimeve të reja dilet nga shtëpia për punë dhe për arsye shëndetësore, mbyllen baret dhe restorantet, shkollat qëndrojnë hapur, ndalohet lëvizja e njerëzve nga një rajon në tjetrin. Me kufizimet e reja edhe për të shkuar në supermarket duhet të marrësh leje. Në Gjermani masat do të jenë në fuqi deri në fund të nëntorit, ndërsa në Francë të paktën deri në muajin dhjetor.
Edhe nën Itali u ashpërsuan masat, sepse pas orës 21:00 të mbrëmjes, çdo ambient publik do të jetë i mbyllur, sportet e kontaktit amator do të qëndrojnë të pezulluara, palestrat dhe pishinat do të duhet të adoptojnë një protokoll të ri. Brenda kësaj jave, baret e restorantet do të mbyllen në mesnate dhe në tavolinë nuk mund të ulen më shumë se 6 persona. Drejt kësaj rruge pritet të shkojë edhe vendi ynë, për shkak të shtimit në masë të rasteve të reja me koronavirus. Por kur mendohet për një mbyllje të dytë, të gjithëve ju shkon mendja menjëherë tek bizneset, që u goditën rëndë nga pandemia në izolimin e parë të vendit.
Franca, Gjermania plan konkret në ndihmë të bizneseve
Gjermania ka vendosur që me mbylljen e dytë bizneseve të vogla mund t’u rimbursohet deri në 75 përqind të xhiros së humbur, bizneseve më të mëdha deri në 70 përqind. Ndërkohë ligjvënësit francezë javën e kaluar miratuan një paketë të re prej 100 miliardë eurosh për të forcuar ekonominë e vendit, bizneset e goditura më shumë nga izolimi i ri do të marrin 10,000 euro në muaj dhe listat e pagave të tyre do të kombëtarizohen në mënyrë efektive në mënyrë që punonjësit që nuk mund të punojnë të mund të mbajnë punën e tyre.
Shqipëria nuk ka ende asnjë plan gati!
Ndërkohë qeveria jonë nuk ka marrë asnjë masë ekonomike nëse do të kemi një mbyllje të dytë. Ministrja e financave, Anila Denaj, ka deklaruar se nuk ka buxhet për ndonjë situatë emergjente dhe se e vetmja gjë që mund të bëhet për bizneset në rast të ndonjë mbylljeje të dytë është shtyrja e deklarimeve tatimore apo shtyrjen e pagesave të detyrimeve.
Kjo do të thotë se nëse do të kemi një tjetër karantinë, shteti shqiptar nuk do të dijë nga të rrotullohet më parë, sepse nuk ka asnjë plan gati. Nëse do të ndodhe kjo gjë, me siguri do të gjendemi përballë një situatë të ngjashme si pak muaj më parë, kur shumica e bizneseve shkuan drejt falimentit. (Kliko)
