Teksa rastet e reja vijojnë të rriten ndjeshëm dhe masat anti-Covid të forcohen, të gjithë po i trembemi një mbylljeje të dytë.
Ndonëse aktualisht diçka e tillë nuk duket në planet e qeverisë, nisur nga masat e shteteve europiane mundësitë e izolimit nuk janë të vogla.
Por, çfarë thonë ekspertët rreth kësaj teorie?
Epidemiologu Ilir Alimehmeti ka folur ditën e djeshme më gjerë rreth kësaj teme në një intervistë për Abcnews.al. Mbyllja për epidemiologun nuk është zgjidhje, por testet e shpejta dhe sidomos grupeve të rriskut po.
Ky diskutim ka të bëjë edhe me gjëra të tjera, me ekonominë. Rënia e ekonomisë shkakton më tepër vdekje se një sëmundje e virusit. Unë si mjek llogaris edhe shëndetin publik. Faktori socio-ekonomik është faktor kryesor. Kjo do mbajtur me seriozitet në konsideratë. Nëse ata bëjnë llogari që të kenë humbje vendesh pune X, ajo përkthehet direkt në shëndet. Një vit jetë i humbur i një pensionisti nuk është njëlloj si e një të riu. Nga pikëpamja kosto e efikasitetit, daljet janë të gjithë te të rinjtë jo te të vjetrit. Po të më pyesësh mua si Ilir, ai nuk është një sektor aq i rëndësishëm, nga krahu tjetër ai është vital për ata që punojnë aty. Për atë që ka restorant ai humb gjithçka. Është diskutim që duhet ta bëjnë qeveritë.
Nga mbajtja e maskës, Alimehmeti tha se nuk do të ketë dhe nuk duhet pritur rezultat, pasi shpjegoi se gjysma e transmetimeve është në shtëpi dhe 40% në administratë, ku maska ka qenë e detyrueshme që në korrik, ndërsa në rrugë nuk ka risk.
Pritet që nuk do të kishte efekt. Nuk është maska që të shpëton, se ti mund ta kesh gjithë ditën me maskë, por fakti që kemi gjysmën e transmetimeve në shtëpi dhe 40% në administratë, ku maska ka qenë e detyrueshme që në korrik, ndërsa në rrugë nuk ka risk. Edhe sikur të kishte një efekt maska, duheshin mjekësore. Po të bësh një xhiro në Tiranë % e atyre që kanë maskë mjekësor të mbajtur mirë është shumë e vogël.
Një këshillë e rëndësishme prej tij ishte edhe fakti se personat që janë të vaksinuar kundër gripit kanë ecuri më të mirë edhe ndaj covid-it. Ai tha se të gjithë personat 65-vjeç e sipër duhet të bëjnë vaksinën kundër gripit, pasi nuk ka asnjë dyshim që ndihmon për të fituar luftën me koronavirusin.
Sivjet rastet me grip do të jenë më të pakta se vitin e kaluar, se të gjithë gripet do të klasifikohen si covid, kjo ka ndodhur në SHBA. Gripi nuk është shumë specifik në shenja. Duke qenë se të gjithë kanë covid-in në mes, nuk e mendon njeri gripin. Ditë e parë me temperaturë jepen antibiotikët, është gabim i madh, sepse mungojnë protokollet zyrtare për mjekun e familjes, nuk i ka dhënë kurrë ministria e Shëndetësisë. Gripi do të bjerë, mundësia për t’i marrë të dyja njëkohësisht ekziston, rrisku për ata që i kanë të dyja njëkohësisht është më i lartë, dhe personat që do të jenë të vaksinuar kundër gripit kanë ecuri më të mirë edhe ndaj covid-it. Ideja është 65-vjeç e sipër vaksinë të gjithëve kundër gripit. Tani nuk ka detyrim, nuk është e detyrueshme, ka qenë e ndikuar fort gjithmonë për këto mosha. Është e këshilluar. Nuk jam pro që të jetë me detyrim, por ka rekomandim të fortë, që ndihmon nuk ka dyshim.
