E drejta e autorit prej vitesh është një nga temat që hap më shumë debat. Për këtë çështje dhe për disa ndryshime në legjislacion, ministrja e Kulturës Elva Margariti ka ftuar ditën e sotme në një takim artistët për të diskutuar. Maragriti kërkoi që në ligjin “Për të drejtat e autorit” (2016) duhet të bëhen disa ndryshime, referuar kushteve që Shqipëria duhet të përmbush për Integrimin në Bashkimin Europian. Mirëpo kërkesat e saj nuk u mirëpritën nga artistët, të cilët janë të bindur se e gjithë kjo po bëhet për shkak të fushatës elektorale.
Sot artistët kanë mundësi të nënshkruajnë kontrata me 3 agjenci kolektive që mbledhin të ardhurat nga përdorimi i materialeve të krijuesve. Këto agjenci kanë qenë 4, por me kontrollet që Ministria e Kulturës ka bërë është zbuluar se një prej tyre abuzonte, ndaj Margariti kërkoi që me ndryshimin e dispozitave të shmanget konflikti i interesit dhe të saktësohet ndarja e tarifave dhe shërbimit të mbledhura prej tyre. Ministrja e u shpreh se këto agjenci mbledhin shumë më shumë para dhe ju japin shumë pak artistëve për të drejtat e tyre.
Artistët të revoltuar: 30 vite e njëjta histori, na përdorni për fushatë elektorale
“Unë jam Robert Radoja, se di kush jeni ju. Nëse keni ardhur për fushatë elektorale, na lini. Deri sot shteti ka vjedhur shtetin. Nuk ka paguar asnjë lekë. Asnjë agjenci. Nuk keni për të zgjidhur asgjë. Unë jam i vetmi njeri që kam marrë më pak nga të gjithë, se kaq kam prodhuar. Por thërrisni ata që u keni dhënë licencat, ç’punë kemi ne?”, u shpreh kompozitori Radoja përballë ministres.
“Unë jam autor edhe dua shpërblimin tim. Këto që thoni ju i kam dëgjuar 300 herë në 30 vjet. A ka shtet këtu? Si është mundur që këto institucione duhet të paguajnë çdo gjë, edhe jo të drejtën e autorit. Ç’më duhen mua këto ligje, kur s’jeni në gjendje ju si shtet edhe MK që të detyroni institucionet që të paguajnë. Unë dua rezultatin. Marrë 200 mijë lekë të vjetra në vit. Është të tallesh. S’kam energji më. Ku shkojnë lekët tona? Djersa jonë 45-vjeçare ku shkon?”, tha kompozitori tjetër Enver Shëngjergji.
Ministrja Margariti kërkoi që agjencitë të shkrihen në një sportel unik për administrimin e të drejtës së autorit, por sipas artistëve kjo mund të hapë rrugën e favorizimit të një personi në formën e një PPP-jë, që nuk ka interes fare për autorët.
Në fund si gjithmonë ky debat u mbyll me shumë zhurmë dhe pa zgjidhje dhe ministrja ju kërkoi artistëve që sugjerimet e tyre t’i depozitojnë në Ministrinë e Kulturës, para se projektligji të miratohet në parlament.
