“Kompanitë celulare dhe shkeljet e tyre”- një kapitull i njohur në shumë vende, por theksohet edhe më tepër në shtete si Shqipëria.
“iconstyle.al” prej kohësh po ndjek me shqetësim këtë çështje, që ka goxha ndikim tek qytetarët shqiptarë, të cilët kanë rënë ‘pre’ e abuzimeve të njëpasnjëshme, një pjesë të të cilave i kemi trajtuar e një pjesë tjetër do i ndjekim në vijim.
Në gjithë këtë vorbull shkeljesh dhe abuzimesh, e gjithë përgjegjësia, përveçse te vetë kompanitë ka rënë tek Autoritet i Konkurrrencës dhe Autoriteti i Komunikimeve Elektronike dhe Postare që në vazhdimësi kanë qëndruar dhe qëndrojnë në heshtje, përballë kësaj çështjeje, por jo vetëm.
E gjithë kjo papërgjegjshmëri arriti kulmin në gusht. Kur pakënaqësitë ndaj kompanive celulare vijnë në rritje dhe ndërhyrja nga AKEP dhe AK është shumë e nevojshme, kjo e fundit mori një vendim aspak normal dhe të papranueshëm, duke mbyllur në heshtje hetimin e hapur për oligopolin e shkurtit të organizuar nga kompanitë celulare. (KLIKO)
Por, çfarë bën Autoriteti i Konkurrencës në vende të tjera për raste të njëjta?
Në Britaninë e Madhe, kompania celulare “Vodafone” është gjobitur me 4.6 milion £ për dështimin në trajtimin adekuat të ankesave të klientëve dhe ofrimin e një shërbimi të dobët për klientët.
Rregullatori i telekomunikacionit Ofcom zbuloi në 2016 se Vodafone nuk arriti të kreditojë në llogaritë e 10,452 klientëve, pasi ata paguan për të shtuar kredinë e telefonit të tyre celular. Klientët e prekur humbën 150,000 £ për një periudhë 17-mujore.
Kjo kompani në Britani, gjithashtu ka shkelur rregullat e faturimit, sepse mbushjet që konsumatorët kishin bërë nuk shfaqeshin në bilancet e tyre të kreditit. Për më tepër, Vodafone nuk arriti të identifikojë ose adresojë problemet dhe veproi vetëm pasi ndërhyri Ofcom. (KLIKO)
Lindsey Fussell, drejtori i grupit të konsumatorëve të Ofcom, tha: “Shërbimet e telefonisë janë një pjesë jetike e jetës së njerëzve dhe ne presim që të gjithë klientët të trajtohen në mënyrë të drejtë dhe me mirëbesim. Ne nuk do të hezitojmë të hetojmë dhe gjobisim ata që shkelin rregullat.”
Vodafone në Shqipëri shkakton dhjetëra pakënaqësi, por askush nuk merr masa!
Duke u nisur nga teoria e mësipërme, vlen t’i kushtohet një rëndësi e madhe të gjithë sektorit të telekomunikacionit, nxitur nga fakti që në vendin tonë has në probleme të mprehta.
Kompania celulare “Vodafone” ndonëse gëzon si abonentë pjesë të mirë të qytetarëve shqiptarë, ka ngjallur edhe pakënaqësitë më të mëdha në radhët e shoqërisë sonë.
Pavarësisht denoncimeve të pafundme, çështje të shumta kanë vënë në pikëpyetje të madhe rolin e Autoritetit të Konkurrencës, Autoritetit të Komunikimeve Elektronike dhe Postare dhe Komisionerit për Mbrojtjen e Konsumatorit.
Si fillim, duhet që AKEP dhe AK të bëhen aktivë në mbrojtje të qytetarëve dhe të përgjegjësive që kanë si institucione. Si rregullatori i tregjeve të telefonisë në vend, AKEP ndonëse ka premtuar shpeshherë se do të marrë masa për uljen e tarifave celulare në vend, objektivat e tij rrallëherë kanë gjetur zbatim deri më tani në vend.
Fatkeqësisht, qytetari shqiptar është i pambrojtur, qoftë nga AKEP, qoftë nga AK.
Një sërë çështjesh janë në pritje të AK dhe enteve rregullatore
Qyetarët ankohen çdo ditë se paketat e tyre më parë mbarohen se aktivizohen. Disa javë më parë pasqyruam denoncimet e qytetarëve që ankoheshin se si 6 GB mbarojnë brenda 30 minutave. (KLIKO) Një problem jo më pak i rëndësishëm është edhe dështimi i mbulimit të territorit, kryesisht i zonave të largëta të vendit, ku kompanitë telefonike nuk kanë interesa të zhvillojnë infrastrukturën. (KLIKO) Nga kjo e fundit, atyre ju lind nevoja që të aktivizojnë paketa Roaming ndonëse janë brenda vendit. Këto të fundit nga ana tjetër janë problem më vetë, pasi përveçse shiten me çmime shumë më të larta se vendet fqinje, apo seç është e përballueshme nga qytetarët shqiptarë, nuk funksionojnë. Qytetarë të shumtë na kanë adresuar pafund shqetësime rreth faktit se kanë mbetur në baltë nëpër botë pikërisht prej këtyre paketave. (KLIKO)
Madje rasti më ekstrem është ai me Kosovën, që ndonëse pritet të hiqen fare tarifat Roaming, ato nuk funksionojnë. (KLIKO)
Verbëria e papranueshme e Autoritetit të Konkurrencës ndaj Anomalive!
Në mënyrë të qartë dhe në shumicë institucionet rregullatore të tregjeve dhe Autoriteti i Konkurrencës, që lidhet drejtpërdrejtë me çështjen, dhe që paguhen nga taksapaguesit shqiptarë për të mbrojtur interesat publike, me veprimet dhe mosveprimet e tyre i shërbejnë interesave të tilla me shenja të qarta subjektivizmi dhe korrupsioni.
Përveç telekomunikacionit, Autoriteti i Konkurrencës ka zgjedhur mos të reagojë dhe t’i shërbejë interesave të kundërta nga ato që i parashikon ligji, që nga sektorët financiarë, të sigurimeve, bankarë, karburanteve, apo edhe testeve të Covid-19 (KLIKO), që “Iconstyle.al” i ka denoncuar prej muajsh.
Sidomos në raste të tilla, ku vihet në lojë një çështje kaq e rëndësishme, është e papranueshme që Autoriteti i Konkurrencës nuk ka ndërmarrë masa ndaj një vjedhjeje të tillë dhe njëkohësisht nuk ka njoftuar publikun në zbatim të detyrimeve të tij ligjore kundër marrëveshjeve të ndaluara të dyshuara të tipit “kartel” nga biznese në tregje të rregulluara.
