Kjo javë ka nisur me trafik të rënduar në kryeqytet dhe shkak është bërë bllokimi i ish-sheshit ‘Shqiponja’ për shkak të punimeve për Unazën e Madhe.
Qytetarë të shumtë duke shfrytëzuar platofrmat online kanë shprehur ankesat e tyre, duke thënë se janë bërë vonë për në punë apo aktivitete të tjera.
https://youtu.be/EpdRJdgO5vw
Drejtori i Autoritetit Rrugor Shqiptar, Ergys Verdho, Drejtori i Policisë Rrugore për Tiranën, Erion Ahmeti dhe Drejtori i DPN2, Bashkia Tiranë, Herion Rrapaj prezantuan ditën e shtunë planin e menaxhimit të trafikut në nyjën “Shqiponja”.
Sipas tyre, punimet në nyjën “Shqiponja” kanë hyrë në fazën e tretë dhe po punohet intensivisht në mënyrë që kjo vepër, e cila zgjidh problemin e trafikut në hyrje të kryeqytetit, të përfundojë në një kohë sa më të shpejt.
Drejtori Verdho prezantoi grafikun sesi do të bëhet menaxhimi i lëvizjes së automjeteve duke theksuar se është vendosur e gjithë sinjalistika e nevojshme, horizontale dhe vertikale, dhe se në bashkëpunim edhe me Policinë Rrugore dhe atë Bashkiake janë marrë masat që të mos ketë probleme në qarkullimin e automjeteve.
Për automjetet e emergjencave do të ketë një rrugë alternative, tha Verdho, teksa ju bëri thirrje drejtuesve të automjeteve që të aksesojnë rrugët alternative për të hyrë në Tiranë, siç është rruga Rrogozhinë-Elbasan-Tiranë ose rruga që kalon përmes Ndroqit.
Ndërkohë, drejtori i Policisë Rrugore për Tiranën, Erion Ahmeti, tha se janë marrë të gjitha masat në bashkëpunim edhe me Policinë Bashkiake për të bërë të mundur menaxhimin e qarkullimit të automjeteve sipas grafikut të përgatitur.
